रेडक्रसद्धारा शिक्षक नायक एवम् जुनियर/युवा गोष्ठी संचालन, ५५ विद्यालयका शिक्षक नायक र जुनियर युवा विद्यार्थीहरुको सहभागिता

शिव प्रसाद लम्साल, धादिङबेशी । नेपाल रेडक्रस सोसाइटी धादिङको १७ औँ शिक्षक नायक एवम् २५ औँ जुनियर/युवा गोष्ठी शुक्रबार देखि सुरु भएको छ । नीलकण्ठ नगरपालिका वडा नं ५ मा रहेको पञ्चकन्या माध्यमिक विद्यालय खाल्टेमा सुरु भएको जुनियर युवा गोष्ठिमा धादिङका ५५ वटा विद्यालयका शिक्षक नायक र जुनियर युवा विद्यार्थीहरुको सहभागिता रहेको छ ।

जिल्ला समन्वय समिति धादिङका प्रमुख नवराज अधिकारीको प्रमुख आतिथ्यतामा शुक्रबार देखि गोष्ठि सुरु भएको हो । गोष्ठि उद्घाटन गर्दै समन्वय प्रमुख अधिकारीले रेडक्रसले सेवा अनुशासन र सिर्जनशिलता अभिवृद्धिमा सहयोग गर्दै आएको बताउनु भएको छ । रेडक्रसमा लाग्नेहरुले समाज बुझ्न सक्ने बताउँदै अधिकारीले समाजको ज्ञान विना विकासका कुनै काम गर्न नसकिने धारणा राख्नु भएको थियो ।

त्यसैगरि कार्यक्रममा रेडक्रस सोसाइटीका केन्द्रीय सदस्य एवम् जुनियर युवा विकास समितिका संयोजक विष्णुराज नेपालले मानवीय तथा सामाजिक विकासमा रेडक्रसले गरिरहेका कामहरु बारेमा बताउनु भएको थियो । रेडक्रस धादिङका उपमन्त्री एवम् जुनियर युवा समितिका संयोजक मिम्वा तामाङको अध्यक्षतामा भएको कार्यक्रममा केन्द्रीय समित सदस्य नारायण तिमल्सिना, नीलकण्ठ नगरपालिका वडा नं ५ का वडाध्यक्ष रामबहादुर श्रेष्ठ लगायतले रेडक्रसको काम, भूमिका र जिम्मेवारीका विषयमा आआफ्ना धारणा राख्नु भएको थियो ।

गोष्ठिको वन्दसत्रमा जलवायु परिवर्तनमा युवाहरुको भूमिका र मानवीय सेवामा रेडक्रसकर्मिको जिम्मेवारीको विषयमा प्रशिक्षण भएको थियो । गोष्ठबाट जुनियर युवाहरुले आगामी बर्षको कार्य योजना निर्माण गर्नेछ ।