ज्वालामुखी गाउँपालिकाद्धारा आधारभुत तहका प्रधानाध्यापकहरुको लागि नेतृत्व विकास तालिम संचालन

धादिङ,१९ माघ ।
ज्वालामुखी गाउँपालिकाले आधारभुत तहका प्रधानाध्यापकहरुको लागि नेतृत्व विकास तालिम संचालन गरेको छ । शिक्षा तालिम केन्द्र धुलिखेलको आयोजना तथा ज्वालामुखी गाउँपालिकाको समन्वयमा सामुदायिक विद्यालय आधारभूत तहका प्रधानाध्यापकका लागि नेतृतव विकास तालिम संचालन गरेको हो ।

तलिमका उद्धघाटन गर्नुहुँदै गाउँपालिकाका अध्यक्ष यमनाथ दनैले विद्यालयका प्रधानाध्यापकहरुको नेतृत्व गर्ने तहलाई प्रशिक्षित गर्ने र विद्यालयको व्यवस्थापन पक्षलाई सुधार गर्ने उद्धेश्यले तालिमको आयोजना गरिएको बताउनुभयो ।

विद्यालयमा प्रधानाध्यापकहरुलाइ पाठ्यक्रम सम्बन्धि सुचना तथा संचार प्रविधिको प्रयोग, नेतृत्व क्षमता विकास गर्ने र गुणस्तरमा सुधार गर्ने उद्धेश्यले तालिमको आयोजना गरिएको शिक्षा युवा तथा खेलकुद शाखा प्रमुख देवकी सिंखडाले बताउनुभयो ।

पाँच दिन सम्म चल्ने तालिममा एकिकृत पाठ्यक्रम, प्रधानाध्यापकहरुको नेतृत्व विकास तथा विद्यालय व्यवस्थापन, विद्यालयमा सुचना तथा प्रविधिको प्रयोग, र सार्वजनिक खरिद व्यवस्थापन लगायत विषयमा छलफल गरिने सिंखडाले जानकारी दिनुभयो ।

गाउँपालिकाका अध्यक्ष यमनाथ दनैको अध्यक्षतामा भएको तालिम उद्धघाटन कार्यक्रममा प्रमुख प्रशासकिय अधिकृत सुमन पण्डित, शिक्षा युवा तथा खेलकुद शाखा प्रमुख देवकी सिंखडा, शिक्षा समितिका सदस्य तथा वडा नं ७ का वडा अध्यक्ष ज्ञानेन्द्र प्रसाद खकुराल, शिक्षा समिति सदस्य विष्णु गुरुङ लगायतको आतिथ्यता रहेको थियो ।

पाँच दिन सम्म संचालन हुने तालिममा आधारभुत तहका २३ जना प्रधानाध्यापक र सहायक प्रधानाध्यापक समेत गरी ३० जनाको सहभागिता रहेको छ ।