अब दामगाडेमा पनि अस्थाई प्रहरी पोष्ट

धादिङ,४ पुष 
नीलकण्ठ नगरपालिका वडा नम्बर १२ सांकोष दामगाडेमा अस्थायी प्रहरी पोष्टको स्थापना गरिएको छ ।आज जिल्ला प्रशासन कार्यालय धादिङका प्रमुख जिल्ला अधिकारी बद्रीनाथ गैह्रेले उक्त अस्थाई प्रहरी पोष्टको उद्घाटन गर्नु भएको हो ।नीलकण्ठ नगरपालिका वडा नम्बर १२ का वडा अध्यक्ष धर्मराज भण्डारी(राजकुमार)को अध्यक्षतामा सम्पन्न कार्यक्रममा प्रमुख जिल्ला अधिकारी बद्रीनाथ गैह्रेको प्रमुख आतिथ्य तथा नीलकण्ठ नगरपालिकाका प्रमुख प्रशासकिय अधिकृत पुरुषोत्तम सुवेदी, जिल्ला प्रहरी कार्यालय धादिङका प्रमुख गौत्तम मिश्रको आतिथ्यता रहेको थियो ।

कार्यक्रममा विभिन्न राजनितिक दलका प्रतिनिधि, शिक्षक विद्यार्थी लगाएतको उपस्थिति रहेको थियो ।प्रहरी चौकी स्थापना भएपछि शान्ति सुरक्षा,अपराध नियन्त्रण, विपद तथा अन्य घटनाको तत्काल उद्दार, विभिन्न सेवा प्रवाहमा सहजीकरण लगायतका कार्यमा सहयोग पुग्ने प्रमुख जिल्ला अधिकारी बद्रीनाथ गैह्रेले बताउनुभयो । पछिल्लो समय अपराधीक घट्नाहरु धेरै घटेको हुनाले स्थानीयस्तरमा शान्ति सुरक्षा कायम गर्न र आपराधिक क्रियाकलापमा कमी ल्याउन अस्थायी प्रहरी पोष्टको स्थापना गरिएको नीलकण्ठ नगरपालिका वडा नं १२ का अध्यक्ष धर्मराज भण्डारीे बताउनुभयो ।

अस्थायी प्रहरी चौकी स्थापना भएपछि शान्ति सुरक्षा कायम गर्न सहज हुने र ग्रामीण क्षेत्रमा हुने आपराधिक क्रियाकलापमा कमी आउने विश्वास गरिएको अध्यक्ष भण्डारीको भनाइ छ ।उक्त प्रहरी पोष्टले नीलकण्ठ नगरपालिकाका वडा नम्बर १२ र १३ मा अपराध न्यूनीकरण, अनुसन्धान र कारवाही, कानून कार्यान्वयन, विपद तथा अन्य घटनाको तत्काल उद्दार तथा व्यवस्थापन लगायतका कार्यमा सहयोग पुग्ने वडा अध्यक्ष भण्डारीले बताउनुभयो ।