गंगाजमुना माइ मेला तथा साँस्कृतिक कार्यक्रम सकियो(फोटो फिचर)

धादिङ,७ मंसिर
धादिङको गंगाजमुना गाउँपालिका वडा न ५ ढाडखर्कमा हरिबोधिनी एकादशीको अवसरमा आयोजित गंगाजमुना माइ मेला तथा साँस्कृतिक कार्यक्रम सम्पन्न भएको छ ।मेलामा विभिन्न स्थानबाट भाँक्री नाच, लामा नाच, चौडी घोडे नाच, लाखे एंव टाकटुके नाच, पन्चेबाजा, मारुनी नाच, भजन किर्तन आदि झाँकिहरु प्रदर्शन गरिएको थियो ।

साथै बुधबार रात भर राष्ट्रिय तथा स्थानिय कलाकारहरुको बेजोड प्रस्तुति समेत रहेको थियो ।हरिबोधनी एकादशीको अघिल्लो रात भक्तजनहरु जाग्राम बस्ने र भोलिपल्ट बिहानै नजिकैको महादेवको मन्दिरमा बत्ती बाल्ने, फूलको डोली, गाईको दुध चढाउने र परेवा उडाउने गर्दछन् ।

मन्दिरमा बली नचढ्ने भएका कारण भाकल बुझाउन मन्दिर पुगेका भक्तजनहरुले जिउँदो परेवा उडाउने गरेका हुन् । उक्त पहाडबाट झरेको २ वटा झरनालाई गंगा र जमुनाको नामबाट चिनिन्छ । उक्त स्थानमा कुकुर धारा नाम गरेको धारा पनि रहेको र त्यहाँ गएर नुहाएमा कुकुरले टोकेको घाउ तथा चोटपटक निको हुने जनबिश्वास रहदै आएको छ ।

गंगाजमुना माइको मेलामा धादिङ, गोरखा, नुवाकोट, रसुवा, चितवन, काठमाण्डौ, आदी स्थानबाट भक्तजनहरु मेला भर्न आउने गरेका छन् । मेलामा बागमती प्रदेशका मुख्यमन्त्री शालिकरा जम्कट्टेल,संघीय सांसद रामनाथ अधिकारी,प्रदेश सांसद गोविन्द लम्साल लगायतले मेलाको अवलोकन गर्नुभएको थियो ।