गंगाजमुना गाउँपालिकामा योजना कार्यान्वयनका लागी प्रशिक्षण तथा अभिमुखिकरण कार्यक्रम संचालन

धादिङबेशी । धादिङको गंगाजमुना गाउँपालिकाले टोल विकास समिति तथा उपभोक्ता समितिहरुको लागि योजना कार्यान्वयन सम्बन्धी प्रशिक्षण तथा अभिमुखीकरण कार्यक्रम सञ्चालन गरेको छ ।

मंगलबार वडा नम्बर ५ मा आर्थिक वर्ष २०८०/०८१ को लागि विनियोजित बजेट कार्यक्रमलाई कार्यन्वयन गर्न टोल बिकास समिति तथा उपभोक्ता समितिहरुलाई प्रशिक्षण तथा अभिमुखीकरण कार्यक्रम सम्पन्न गरेको हो ।

बिकास निर्माणका कार्ययोजनाहरु कार्यन्वयन गर्दा असहज हुने,अनियमितता देखिने,काममा ढिलासुस्ती हुने,ईस्टमेट बमोजिमको कार्य प्रगतीमा कमजोर देखिने हुँदा गाउँपालिकाले एउटा कार्यबिधि नै बनाएर पालिका भरिकै सवै वडाहरुमा चरणबद्ध रुपमा यस किसिमको कार्यक्रम संचालन गरिने गंगाजमुना गाउँपालिकाका प्रवक्ता तथा वडा न ५ का वडा अध्यक्ष कुमार बहादुर अधिकारीले बताउनु भयो ।

वडा न ५ मा भएको कार्यक्रममा गंगाजमुना गाउँपालिकाका प्रमुख प्रशासकीय अधिकृत अनिल श्रेष्ठ, वडा नम्बर ५ का वडा अध्यक्ष कुमार बहादुर अधिकारी, कार्यपालिका सदस्य भद्रकुमारी नेपाली, योजना शाखा प्रमुख युवराज थपलिया, विभिन्न राजनैतिक दलका प्रतिनिधी, उपभोक्ता समिती,टोल बिकास समितीका पदाधिकारी तथा सदस्यहरुको सहभागीता रहेको थियो ।