शिक्षकहरु चरणबद्ध आन्दोलनमा,आज शिक्षा विकास तथा समन्वय इकाईमा ३ घण्टा धर्ना

धादिङ,३० साउन ।
सरकारले प्रस्तावित गरेको विद्यालय शिक्षा विधेयक सच्याउनु पर्ने माग गर्दै शिक्षकहरु अहिले आन्दोलित बनेका छन् ।स्थायी, अस्थायी, करार, राहत, साविक उच्च माध्यमिक विद्यालय, बालकक्षा, विशेष कक्षा, शिक्षण सिकाइ अनुदान, प्राविधिक धारलगायत सबैखाले शिक्षक र विद्यालय कर्मचारीका माग विधेयकले सम्बोधन नगरेको भन्दै नेपाल शिक्षक महासंघ अहिले आन्दोलनमा रहेको छ ।माध्यमिक शिक्षा सम्मको अधिकारलाई स्थानीय तहको एकल अधिकारको सूचीमा राख्न नहुने माग महासंघले राखेको छ ।

नेपाल शिक्षक महासंघले जिल्ला स्तरीय धर्ना कार्यक्रम अन्तर्गत आज शिक्षा विकास तथा समन्वय ईकाई, धादिङको कार्यालय भवन अगाडी शिक्षकहरुले धर्ना दिएका छन् ।केन्द्रिय कार्यक्रम अनुसार धादिङका शिक्षक नेताहरुले ३ घण्टा धर्ना दिएका हुन् ।सरकारले विधेयक सच्याएर माग पूरा नगरे अनिश्चितकालिन विद्यालय बन्द गरिने समेत महासंघले जनाएको छ ।

नेपाल सरकारसँग विगतमा भएका ३० बुदे ५१ बुदे सहमतीहरु अक्षरस पालना गर्न, कार्यन्वयन गराउनको लागि, नयाँ बन्ने शिक्षा ऐनमा, माग र मुद्धा समेटनको लागि धर्ना कार्यक्रम गरिएको शिक्षकहरुले बताएका छन् । धर्ना कार्यक्रममा नेपाल शिक्षक महासंघका केन्द्रीय सचीव अर्जुनबहादुर नगरकोटी, नेपाल शिक्षक संघ बागमती अध्यक्ष दिपक सिंखडा, एकीकृत अखिल नेपाल शिक्षक संगठन बागमती प्रदेश अध्यक्ष शंकर अधिकारी, लगायतका शिक्षक नेताहरुको सहभागिता रहेको थियो ।त्यसैगरी साउन ३२ गते ७ वटै प्रदेशको सामाजिक विकास मन्त्रालयमा धर्ना कार्यक्रम गर्ने र भदौ १ गते प्रदेश तथा संघीय सांसदहरुलाई संसदमा बुलन्द रुपमा आवाज उठाउन अनुरोध गर्ने कार्यक्रम रहेको जनाएको छ ।