नगरबापालिकाबाट प्रवाह हुने सेवालाई सरल र सहज बनाउन मेयर ढुंगानाको निर्देशन

धादिङ,२६ पुस ।
नीलकण्ठ नगरपालिकाबाट प्रवाह हुने सेवालाई सरल र सहज बनाउनको लागि नगरपालिका संघका अध्यक्ष तथा नगर प्रमुख भीम प्रसाद ढुंगानाले कर्मचारीलाई निर्देशन दिनुभएको छ । नीलकण्ठ नगरपालिकाको आर्थिक वर्ष २०७८७९ को वार्षिक समिक्षा तथा स्थानीय तह संस्थागत स्वमुल्यांकन सम्बन्धी अन्तरक्रिया कार्यक्रमलाई सम्बोधन गर्नुहुदै उहाँले सो कुरा बताउनु भएको हो ।नगरपालिकाका उप प्रमुख दिपक विश्वकर्माको अध्यक्षतामा सम्पन्न भएको कार्यक्रममा नगर प्रमुख भीमप्रसाद ढुंगानाको प्रमुख आतिथ्यता रहेको थियो । कार्यक्रममा प्रमुख प्रशासकीय अधिकृत दिनेशराज पन्त, वडा अध्यक्ष, कार्यपालिका सदस्य, विषयगत शाखाका प्रमुख तथा प्रतिनिधि लगायतको उपस्थिति रहेको थियो ।

कार्यक्रममा गत आर्थिक वर्षमा नगरपालिकाबाट सम्पन्न भएका कामहरुका बारेमा समिक्षा गरिएको थियो । विषयगत शाखाहरुबाट कार्यक्रम तथा योजनाहरु सञ्चालन एवं सम्पन्न गर्दा आइपरेका चुनौती र आगामी दिनमा तिनका समाधानका उपायहरुको बारेमा कार्यक्रममा सहभागीहरुले आफ्नो धारणा राखेका थिए । नीलकण्ठ नगरपालिकाले विभिन्न विधामा देशभरमा नै उत्कृष्ट स्थान हासिल गर्दै आइरहेको सन्दर्भमा आगामी दिनमा सेवा प्रवाहलाई कसरी सरल र सहज बनाउन सकिन्छ भन्ने बारेमा समेत छलफल भएको थियो ।

त्यस्तै स्थानीय तह संस्थागत स्वमुल्यांकन (लिजा) सम्बन्धमा नयाँ निर्वाचित जनप्रतिनिधिहरुलाई सामान्य अभिमुखीकरण समेत गरिएको थियो । अभिमुखीकरण सत्रलाई सहजीकरण गर्दै नगरपालिकाका सल्लाहकार दीपक कोइरालाले लिजा भनेको के हो, लिजाको मुल्यांकन कसरी र कुन कुन सुचकका आधारमा गरिन्छ भन्ने बारेमा जानकारी गराउनु भएको थियो । सोही सत्रमा उपस्थित जनप्रतिनिधि तथा कर्मचारीहरुलाई पाँच समुहमा विभाजन गरि लिजाका विभिन्न प्रश्नावलीहरुमा उल्लेख भएका प्रमाणहरु बमोजिम स्वमुल्यांकनको नमुना अभ्यास समेत गरिएको थियो ।

अभ्यास पछि कार्यक्रमलाई सम्बोधन गर्दै नगर प्रमुख भीम प्रसाद ढुंगानाले आर्थिक वर्ष २०७७।७८ मा नीलकण्ठ नगरपालिकाले ९७ अंक प्राप्त गरि लिजामा देशभरमै उत्कृष्ट भएकाले आगामी दिनमा पनि सोही अनुसार अंक प्राप्त गर्न आवश्यक प्रमाण तथा कागजात उपलब्ध गराउन सम्पूर्ण विषयगत शाखाहरुलाई निर्देशन दिनु भएको थियो । साथै अघिल्ला वर्षहरुमा स्वमुल्यांकनका क्रमा देखिएका समस्या तथा अंक दाबी गर्न नसकेका सुचकहरुमा हाल दाबी गर्न मिल्ने प्रमाण भए सोका लागि कुनै कसर बाँकी नराख्न समेत निर्देशन दिनु भएको थियो । नगर उप–प्रमुख दीपक विश्वकर्माले पनि नगरपालिकाको सफलतामा जस तथा असफलतामा अपजस सम्पूर्ण जनप्रतिनिधि तथा कर्मचारीमा जाने भएकाले आ–आफ्नो तहबाट सकेको सहयोग तथा सहजीकरण गर्न आग्रह गर्नुभयो ।

सोही कार्यक्रममा नीलकण्ठ नगर प्रज्ञा प्रतिष्ठानका नवनियुक्त पदाधिकारीहरुको सपथ तथा पदभार ग्रहण कार्य सम्पन्न भएको छ । प्रतिष्ठानका नवनियुक्त अध्यक्ष बद्रीप्रसाद दाहाल, उपाध्यक्ष डा. गणेश धमला, कोषाध्यक्ष रिता थापा मगर, सदस्य विनोदमान श्रेष्ठ र सदस्य सचिव प्रकाश पौडेलले पद तथा गोपनियताको सपथ लिनुभएको थियो । अध्यक्ष दाहाललाई नगर प्रमुख ढुंगानाले र अन्यलाई अध्यक्ष दाहालले सपथ खुवाउनु भएको थियो ।

सपथ ग्रहण पश्चात कार्यक्रमलाई सम्बोधन गर्दै नगर प्रमुख ढुंगानाले स्थानीय तहहरु मध्ये नीलकण्ठ नगरपालिकाले प्रज्ञा प्रतिष्ठानको स्थापना गरि कला साहित्यको क्षेत्रमा नमुना कार्यको थालनी गरेको बताउनु भयो । उहाँले आगामी दिनहरुमा प्रतिष्ठानले अन्य स्थानीय तहहरुले समेत अनुसरण गर्न मिल्ने गरि काम गर्नेमा विश्वाश व्यक्त गर्नु भयो । ३ वर्षको पदावधि रहने प्रतिष्ठानका लागि चालु आर्थिक वर्षमा नगरपालिकाबाट दश लाख रुपैयाँ विनियोजन गरिएको उहाँले जानकारी दिनुभयो ।