धादिङ महोत्सवमा दर्शकको रोजाई स्थानीय उत्पादन

धादिङ । धादिङ महोत्सवमा दर्शकको रोजाई मनोरन्जन मात्र नभई स्थानीय उत्पादनमा समेत देखिएको छ । आठौ धादिङ महोत्सवमा दर्शकको रोजाई स्थतानिय उत्पादन भएसंगै स्थानिय उत्पादनले राम्रे संग बजार पाएका हुन् ।

धादिङको सल्यानटारको मास, भटमास, बोडी, खरीको पिडालु, मकै, साना उद्योगहरुले उत्पादन गरेको अचार, मह लगायतका स्थानिय उत्पादन दर्शकहरुको रोजाइमा परेको छ । त्रिपुरासुन्दरी गाउँपालिका वडा नं।१ सल्यानटारका नारायण दराईले सल्यानटारको मुख्यखेतीको रुपमा रहेको हिउँदे बाली मास भटमासको स्टल राखेका छन् । त्यसैगरी महोत्सवमा दुना टपरी,चप्पल उद्योग र परालको गुन्द्री बुन्ने स्टलले पनि दर्शकको ध्यान तानेको छ । परम्परागत सिपलाई नयाँ पुस्तामा पुस्तान्तरण गर्न नीलकण्ठ नगरपालिका वडा नं।४ की कृष्णमाया श्रेष्ठ गुन्द्री बुन्न सिकाउनुहुन्छ । रुविभ्यालीमा पाइने जडिबुटी,स्थानीय स्तरमा लगाइने परम्परागत पोशाकहरुमा पनि महोत्सवमा आउनेले चासो दिनेगरेको गंगाजमुना गाउँपालिकाका चित्र लामाले बताउनुभयो ।

धादिङको दिगो विकास र अर्थतन्त्रको आधार, कृषि जलस्रोत पर्यटन र उद्योगको पुर्वाधार भन्ने मुल नाराको साथ धादिङ उद्योग बाणिज्य संघको आयोजनामा आठौँ धादिङ महोत्सवमा कृषि तथा घरायसी उत्पादनलाई प्रदर्शनी तथा बिक्रीमा राखिएको छ । महोत्सवमा स्थानीय उत्पादनको प्रदर्शनी र बिक्रि वितरण, कला, संस्कृति र भेषभूषाको जगेर्ना साथै धादिङका धार्मिक, ऐतिहासिक र पर्यटकीय स्थलहरुको पर्यटन प्रवद्धन गर्ने उद्धेश्य रहेको छ । महोत्सव अवधीभर विभिन्न देशका कलाकारहरुद्धारा सांस्कृतिक कार्यक्रम समेत प्रस्तुत भइरहेको छ । अहिले महोत्सवमा बालबालिका र युवायुवतीहरुको रमाउने थलो बनेको छ ।