संविधान दिवसको अवसरमा धादिङका ८८ जनाले गरे रक्तदान

धादिङ,०३ असोज ।
आज असोज ३ अर्थात् संविधान दिवस । ०७२ असोज ३ गते आजकै दिन संविधान जारी भएको अवसरमा धादिङ सहित देशैभर विविध कार्यक्रम गरेर मनाइएको छ ।आठौं संविधान दिवसकै अवसरमा धादिङका बिभिन्न स्थानमा भएको रक्तदान कार्यक्रममा ८८ जनाले रक्तदान गरेका छन् ।

नेपाल रेडक्रस सोसाईटी केवलपुर उप–शाखाको आयोजनामा थाक्रे गाउँपालिका–६ महादेवबेशीमा भएको रक्तदान कार्यक्रममा १४ जना महिला र ६१ जना पुरुष गरी ७५ जनाले रक्तदान गरेको धादिङ रेडक्रसका उपमन्त्री नारायण कुमार श्रेष्ठले जानकारी दिनुभयो ।

यस्तै अनेरास्वविय(क्रान्तिकारी) धादिङको आयोजनामा धादिङबेशी स्थित जिल्ला समन्वय समितिको प्राङ्गणमा भएको रक्तदान कार्यक्रममा १३ जना पुरुषले रक्तदान गरेको श्रेष्ठले बताउनुभयो । रक्तदान कार्यक्रममा नेपाल रेडक्रस सोसाईटी रक्तसञ्चार सेवा केन्द्र धादिङको प्राबिधिक सहयोग रहेको थियो ।

जिल्लामा रगतको अभावलाई न्युनीकरण गर्नको लागी विभिन्न मेला, पर्व, उत्सव, सहकारीको बार्षिक साधारण सभा लगायतको भेला हुने कार्यक्रममा रक्तदान कार्यक्रम राखि धादिङमा रगत संकलन गरीदैँ आएको छ ।