बेनिघाट रोराङको च्यात्रा गाउँमा विप्लवको विद्यार्थी संगठनद्धारा विद्यालय भवन निर्माण

धादिङ,०४ भाद्र ।
अखिल (क्रान्तिकारी) ले धादिङको बेनिघाट रोराङ गाउँपालिकाको च्यात्रा गाउँमा विद्यालय भवन निर्माण गरेको छ।

विप्लव नेतृत्वको नेपाल कम्युनिस्ट पार्टीको विद्यार्थी संगठन अखिल (क्रान्तिकारी) ले बेनिघाट–रोराङ गाउँपालिकाको वडा न. १ र २ को सिमानामा पर्ने च्यात्रा गाउँमा विद्यालय भवन निर्माण गरेका हुन् । उक्त भवनको शुक्रबार एक कार्यक्रमका बिच संगठनले उद्घाटन गरेको छ ।

धादिङ जिल्लाको अति विकट त्यस बस्तीमा यसभन्दा पहिले विद्यालय थिएन ।नजिकको विद्यालय पनि तीन घण्टाको दुरीमा रहेको र भिरालो वाटो भएकोले बालबालिका पढ्ने अवसरवाट वञ्चित थिए । अखिल (क्रान्तिकारी) अध्यक्ष प्रकाश शाहीका अनुसार २५ घरधुरी रहेको यस गाउँमा करिब ५० को संख्यामा विद्यालय जाने उमेरका बालबालिका रहेका छन् ।

अखिल (क्रान्तिकारी ) ले आफ्नै लगानी, श्रमदान र स्थानीयसंगको सहकार्यमा ४ कोठे विद्यालय भवन निर्माण गरेको हो । उद्घाटनलगत्तै विद्यालयमा पढाइ सुरु भएको छ र ३० जना बालबालिका नियमित आउने गरेको शिक्षक अस्मिता घलानले जानकारी दिनुभयो ।

विद्यालय भवनको उद्घाटनमा नेकपाका केन्द्रीय सदस्य सन्देश पौडेल, अखिल (क्रान्तिकारी) अध्यक्ष प्रकाश शाहीलगायतका नेता कार्यकर्ताको सहभागिता रहेको थियो ।