काँग्रेसको राजनीतिलाई तिलान्जली दिएर स्वतन्त्र उम्मेवारको रुपमा उभिए : अधिकारी

काठमाडौं,२० बैशाख ।
२० वर्ष लामो काँग्रेसको राजनीतिलाई तिलान्जली दिएर स्वतन्त्र उम्मेवारको रुपमा उभिए कल्पना अधिकारीले बताउनुभएको छ । निलकण्ठ नगरपालिकाको उपमेयरको पदमा स्वतन्त्र उम्मेदवारी दिनुभएकी नेतृ अधिकारीले सत्ता साझेदार दल बीचको गठबन्धनप्रति असन्तुष्टि जनाउँदै उम्मेदरवारी आफ्नो निम्ती नभई संगठनको बचाउको लागि भएको भन्दै समग्र महिला र युवाहरुको खोला जस्तै आँशु बगिरहेको बताउनुभयो ।

बुधबार रिपोर्टर्स क्लब नेपालमा पत्रकार सम्मेलन गर्दै नेतृ अधिकारीले आफूले पार्टी संगठनको लागि स्वतन्त्र उम्मेदवारी दिएको बताइन् । काँग्रेसमा निरन्तर २० वर्षदेखि खटिएको उल्लेख गर्दै पार्टी, संगठन, समाज, सबै दाजुभाई, दिदी बहिनीलाई मर्न नदिन स्वतन्त्र उम्मेदवारी दिएको स्पष्ट पार्नुभयो । उहाँले भन्नुभयो ‘अब जनताहरुले सोच्नुपर्ने बेला आएको छ ।’ आफूले बोलेको आवाज समग्र महिला र युवाहरुको आवाज भएको उहाँका भनाई छ ।

उहाँले आफ्नो उम्मेदवारी पार्टीलाई खबरदारी गर्नका लागि भएको बताउनुभयो । ‘पार्टी भित्र बसेर दलिय भागवण्डामा आफ्नो पार्टीलाई लिलाम गर्ने होकी, संगठन पनि बिग्रने हो की भन्ने विषयको खबरदारी मैले गर्न खोजेको हो,’ उहाँले भन्नुभयो ‘म एउटा मरौला तर मेरो संगठन, समाज, सबै दाजुभाई र दिदी बहिनीलाई मर्न दिन हुँदैन् ।’

लामो समयदेखि आफु कांग्रेसको राजनीतिमा लागेको उल्लेख गर्दै आफूले रुख चिन्हमा खुशीसाथ लड्न पाउनुपर्नेमा नपाएको गुनासो गर्नुभएको छ । रुख चिन्हमा लड्ने आफ्नो अधिकार भएको दाबी गर्दै पार्टीले संविधानले निर्धारण गरेको ३३ प्रतिशत महिलाको कोटा कटौती गरेको उहाँले टिप्पणी गर्नुभयो । अधिकारीले जनताहरु आफूलाई मत दिन अत्यन्त्तै आतुर रहेको भन्दै पछिल्लो समय आफ्नै जीवनको विभिन्न संघर्षले पनि निकै बलियो हुँदै गएको उल्लेख गर्दै धेरैपटक समग्र महिलाको हकहित, युवा तथा दलितको विषयलाई आफुले उठाउँदै आएको बताउनुभयो ।

उहाँले अब जनताले गल्ती नगरी मत दिनु पर्ने धारणा राख्नुभयो । आफ्नो मात्र नभएर हजारौ, युवा, जनजाती, महिलाको आवाज सम्झेर गुलाबको फूलमा मतदान गर्न सबैलाई आग्रह गर्नुभएको छ । आफुले चुनाव जित्ने र आफ्नो जित सम्पुर्ण धादिङवासीको जित हुने उहाँको भनाइ थियो । अधिकारीले बाग्मती प्रदेश सरकारको साझेदारीमा, यातायातको साधन नविकरण धादिङमा राख्ने समेत प्रतिवद्धता व्यक्त गर्नुभयो । स्वास्थ्य क्षेत्रमा मानविय सेवा, नगरभित्र निःशुल्क एम्बुलेन्स सेवा दिने पनि बताउनुभयो । त्यस्तै,नगरपालिकामा एकल महिलालाई छहारी, एकल पुरुषलाई सामाजिक सुरक्षा भत्तामा भकारी भर्ने उहाँको प्रतिवद्धता रहेको छ ।