जेष्ठ नागरिकको हकहितको लागी नगरपालिकाले विषेश योजना ल्याउछः जगन्नाथ पन्त

नीलकण्ठ नगरपालिकाका प्रमुख प्रशासकिय अधिकृत जगन्नाथ पन्तले जेष्ठ नागरिकहरुको हकहितको लागी नगरपालिका गम्भिर बनेको बताउनु भएको छ । जेष्ठ नागरिकहरुको क्रियाशीलता बढाउनको लागी नगर स्तर र वडा स्तरमा समिति निर्माण गर्ने बताउनुभएको छ ।
नीलकण्ठ नगरपालिकाको आयोजनामा शुक्रबार धादिङबेसीमा सम्पन्न भएको जेष्ठ नागरिक सम्बन्धी सरोकारवाला बीच अन्तरक्रिया कार्यक्रममा आफ्नो प्रस्तुती राख्नुहुदैँ पन्तले वडास्तरमै गएर जेष्ठ नागरिक परिचय पत्र वितरण गर्ने बताउनुभएको छ ।

जेष्ठ नागरिकहरुका अवलोकन भ्रमणको लागी नगरपालिकाले बजेट छुट्टाएको समेत बताउनु भएको छ । जेष्ठ नागरिकहरुको गुनासो सुन्न र गुनासो सम्बोधन गर्नको लागी कार्यक्रमको आयोजना गरीएको प्रमुख प्रशासकिय अधिकृत जगन्नाथ पन्तले बताउनुभएका छ ।
नीलकण्ठ नगरपालिकाका महिला विकास अधिकृत भद्रा अर्यालले सन्चालन गर्नुभएको कार्यक्रममा अधिकृत पन्तले नयाँ संविधानमा रहेका हकअधिकार,नगरपालिकाको आगामी योजना र सेवा प्रवाहको विषयमा एक घण्टाको पस्तुतीकरण गर्नुभएको थियो । नगर स्तरीय जेष्ठ नागरिक समितिका अध्यक्ष गोविन्द सापकोटाको अध्यक्षतामा सम्पन्न भएको कार्यक्रममा प्रमुख जिल्ला अधिकारी भागिरथ पाण्डेको प्रमुख आतिथ्य रहेको थियो ।
नगरपालिकाको उप मेयर मनराज भण्डारीको विषेश आतिथ्य रहेको कार्यक्रममा जिल्ला प्रहरी कार्यालय धादिङका प्रहरी प्रमुख राजकुमार वैदवार, तीन वटै सुरक्षा निकायका प्रमुख, जिल्ला अस्पतालका प्रतिनिधि र यातायात सेवा प्रवाहका प्रतिनिधि लगायत सरोकारवाला निकायका प्रतिनिधिहरुको सहभागिता रहेको थियो ।कार्यक्रममा नीलकण्ठ नगरपालिका भित्रका ४० भन्दा बढी जेष्ठ नागरिकहरुको सहभागिता रहेको थियो ।