सल्यानटार खानेपानी आयोजना अन्तिम चरणमा, एक हजार सात सय घरमा धारा जडान

धादिङ,८ कात्तिक । धादिङको त्रिपुरासुन्दरी गाउँपालिका–१ र २ स्थित सल्यानटारका बासिन्दालाई घरघरमा खानेपानी उपलब्ध गराउने उद्देश्यले निर्माणाधीन मनपाङ खोला–सल्यानटार सहलगानी खानेपानी तथा सरसफाइ आयोजना अन्तिम चरणमा पुगेको छ । आयोजनाअन्तर्गत हालसम्म एक हजार सात सय घरमा धारा जडान गरिएको छ ।

लामो समयदेखि खानेपानीको अभाव भोग्दै आएका सल्यानटारका बासिन्दालाई करिब १३ किलोमिटर टाढा रहेको मनपाङ खोलाको मुहानबाट पानी ल्याई वितरण गर्ने उद्देश्यले आयोजना निर्माण भइरहेको हो ।

मनपाङ खोला सल्यानटार खानेपानी तथा सरसफाइ उपभोक्ता समितिको पाँचौँ साधारणसभा तथा अधिवेशनमा प्रस्तुत प्रगति विवरणअनुसार आयोजनाका अधिकांश संरचना निर्माण भइसकेका छन् । केही घरधुरीमा धारा जडान तथा बाँकी प्राविधिक काम सम्पन्न गर्नुपर्ने अवस्था रहेको समितिले जनाएको छ ।

समितिकी अध्यक्ष कृष्णकुमारी श्रेष्ठका अनुसार हाल आरुघाट र विशालनगरबाहेकका करिब दुई हजार दुई सय ५० घरधुरीलाई खानेपानी सेवा उपलब्ध गराउन सकिने अवस्था रहेको छ । तीमध्ये एक हजार सात सय घरमा धारा जडान भइसकेको र बाँकी घरमा जडानको काम अघि बढिरहेको उहाँले जानकारी दिनुभयो ।

आर्थिक अभावका कारण धारा जडान गर्न नसक्ने विपन्न परिवारलाई निःशुल्क धारा उपलब्ध गराउने व्यवस्था मिलाइने अध्यक्ष श्रेष्ठले बताउनुभयो । यसबाट आर्थिक रूपमा कमजोर परिवारलाई पनि खानेपानी सेवामा जोड्ने समितिको योजना छ ।
सल्यानटार क्षेत्रमा खानेपानीको दीर्घकालीन समस्या समाधान गर्ने उद्देश्यले विसं २०७५ मा मनपाङ खोलाको मुहान दर्ता गरिएको थियो । त्यसपछि नेपाल सरकार, नगर विकास कोष र उपभोक्ता संस्थाको लागत सहभागितामा आयोजना निर्माण प्रक्रिया अघि बढाइएको हो ।

आयोजनाको निर्माणका लागि रु २३ करोड ८५ लाख ४९ हजार ३८७ मा ठेक्का सम्झौता भएको थियो । निर्माणको जिम्मेवारी पाएको सगुन कन्स्ट्रक्सन, रुपन्देहीले बाँकी काम गरिरहेको छ ।
नगर विकास कोषको अभिलेखअनुसार विसं २०८० जेठ २८ गते आयोजनाका लागि रु चार करोड ७७ लाख नौ हजार ऋण लगानीसम्बन्धी सम्झौता गरिएको थियो । आयोजनाको प्रारम्भिक डिजाइनमा दुई हजार आठ सय ९७ घरधुरीमा खानेपानी पु¥याउने लक्ष्य राखिएको थियो ।

अध्यक्ष श्रेष्ठका अनुसार बाँकी निर्माण तथा प्राविधिक परीक्षणसम्बन्धी काम सम्पन्न भएपछि आयोजना उपभोक्ता समितिलाई हस्तान्तरण गरिनेछ । हस्तान्तरणपछि नियमित पानी वितरण, मर्मतसम्भार, व्यवस्थापन तथा खानेपानीको गुणस्तर कायम राख्ने जिम्मेवारी समितिमा रहनेछ ।

साधारणसभामा सहभागी स्थानीय जनप्रतिनिधिहरूले निर्माण सम्पन्न भएपछि आयोजनाको दिगो सञ्चालन, नियमित मर्मतसम्भार र खानेपानीको गुणस्तरमा विशेष ध्यान दिनुपर्ने आवश्यकता औँल्याएका छन् । कार्यक्रममा त्रिपुरासुन्दरी गाउँपालिकाका अध्यक्ष राजु उप्रेती, उपाध्यक्ष देवराज धरेल, वडाध्यक्ष कृष्ण खत्री, गाउँपालिकाका पूर्वअध्यक्ष शम्भुकुमार थापा र पूर्वउपाध्यक्ष देवीकुमारी बुर्लाकोटीलगायतको सहभागिता थियो ।

वक्ताहरूले खानेपानी नागरिकको आधारभूत आवश्यकता भएकाले विपन्न तथा सेवाबाट वञ्चित परिवारको पहुँच सुनिश्चित गर्नुपर्नेमा जोड दिएका थिए । साथै खानेपानी वितरण प्रणालीको नियमित अनुगमन, उपभोक्ताको अधिकार संरक्षण र सरसफाइका कार्यक्रमलाई प्रभावकारी बनाउनुपर्ने बताएका थिए ।

समितिको पाँचौँ साधारणसभा तथा अधिवेशनमा आयोजनाको प्रगति, आगामी कार्ययोजना तथा उपभोक्ताका सरोकारका विषयमा छलफल गरिएको थियो ।