धादिङमा अनलाइनमार्फत उद्योग दर्ता सुरु

धादिङ, ८ असोज : धादिङमा अनलाइनमार्फत उद्योग दर्ता सुरु भएको छ । उद्योग, वाणिज्य, पर्यटन तथा यातायात कार्यालय धादिङले यही असोज ६ गतेदेखि उक्त सेवा सञ्चालनमा ल्याएको हो ।

कार्यालय प्रमुख चूडामणि पुरीले उद्योग दर्ताका लागि अनलाइन आवेदन अनिवार्य गरिएको बताउनुभयो । उहाँको भनाई अनुसार अब हस्तलिखित निवेदन र फारामका आधारमा उद्योग दर्ता गरिने छैन । दर्ता प्रमाणपत्रको सक्कल प्रति लिन भने हाललाई सेवाग्राही कार्यालयमै उपस्थित हुनुपर्नेछ ।

उद्योग दर्ता गर्न चाहने सेवाग्राहीले अनलाइन फाराम भर्नुपर्नेछ । दर्ताका लागि आवश्यक सम्पूर्ण कागजात स्क्यान गरी सोही प्रणालीमा अपलोड गर्नुपर्ने व्यवस्था गरिएको छ । पेस भएका कागजात कार्यालयबाट रुजु भएपछि सेवाग्राहीले कार्यालयले पठाएको क्यूआर कोडमार्फत राजस्व दाखिला गर्नुपर्नेछ । राजस्व दाखिलापछि दर्ता प्रमाणपत्र उपलब्ध हुने र दर्ता भएको जानकारी एसएमएसमार्फत प्राप्त गर्न सकिने कार्यालय प्रमुख पुरीले बताउनुभयो ।

अनलाइन फाराम भर्न कठिनाइ भए कार्यालयको टेलिफोन नम्बर ०१०–५२०१७७ मा सम्पर्क गरी सहयोग लिन सकिने कार्यालयले जनाएको छ ।