अन्तर्राष्ट्रिय युवा दिवसको अवसरमा रास्वपा धादिङले सप्ताहव्यापी कार्यक्रम गर्ने

युवा अन्तरक्रियादेखि रक्तदान, वृक्षारोपण र ज्येष्ठ नागरिक सम्मानसम्म

धादिङबेशी,२५ साउन । राष्ट्रिय स्वतन्त्र पार्टी (रास्वपा) धादिङले अन्तर्राष्ट्रिय युवा दिवसको अवसर पारेर जिल्लाका विभिन्न स्थानमा सप्ताहव्यापी कार्यक्रम आयोजना गर्ने भएको छ । पार्टीले युवा मनोपरामर्श तथा मानसिक स्वास्थ्य अन्तरक्रिया, सांसदसँग युवा संवाद, रक्तदान, वृक्षारोपण र ज्येष्ठ नागरिक सम्मान लगायतका कार्यक्रम तय गरेको हो ।

रास्वपा धादिङ जिल्ला सभापती राजन अर्यालका अनुसार साउन २७ गते धादिङबेँसीस्थित सिटि हलमा युवा मनोपरामर्श तथा मानसिक स्वास्थ्यसम्बन्धी अन्तरक्रिया आयोजना गरिनेछ । सोही दिन सांसदहरूसँग युवा अन्तरक्रिया कार्यक्रम पनि सञ्चालन गरिने भएको छ ।

त्यस्तै, साउन ३० गते धुनीबेँसी नगरपालिकामा बृहत् रक्तदान कार्यक्रम आयोजना गरिनेछ । सोही दिन सिद्धलेक गाउँपालिका–२ मा फलफूलका बिरुवा रोपेर वृक्षारोपण कार्यक्रम सञ्चालन गर्ने तालिका रहेको सभापती अर्यालले बताउनु भयो ।

कार्यक्रम अन्तर्गत साउन ३१ गते गजुरी गाउँपालिकामा वृक्षारोपण गरिनेछ भने सोही दिन बेनिघाट रोराङ गाउँपालिकामा युवाको सहभागितामा ज्येष्ठ नागरिक सम्मान कार्यक्रम आयोजना गरिने भएको छ ।

रास्वपा धादिङले कार्यक्रमलाई युवा सहभागिता, सामाजिक उत्तरदायित्व, वातावरण संरक्षण तथा ज्येष्ठ नागरिकप्रतिको सम्मानसँग जोडेर सञ्चालन गर्न लागिएको सभापती अर्यालको भनाई छ ।

पार्टीले जिल्ला कार्यसमितिका सदस्य तथा पदाधिकारी, क्षेत्रीय, पालिका र वडा समितिका पदाधिकारी तथा सदस्यसहित पार्टी सदस्य, समर्थक र शुभेच्छुकलाई निर्धारित कार्यक्रमहरूमा सक्रिय सहभागिता जनाउन अनुरोध गरेको छ ।