धादिङमा विद्यालयस्तरीय क्षयरोग अभिमुखिकरण

धादिङ, १७ जेष्ठ  । नेपाल क्षयरोग निवारण संस्था, जिल्ला कार्य समिति धादिङको आयोजनामा नेत्रावती डवजोङ गाउँपालिका वडा नं. १ बोराङ स्थित मंगलादेवी माध्यमिक विद्यालयमा एकदिने विद्यालयस्तरीय क्षयरोग सम्बन्धी अभिमुखिकरण कार्यक्रम सम्पन्न भएको छ ।

“क्षयरोगको संका लाग्ने बित्तिकै सकेसम्म छिटो स्वास्थ्य संस्थामा गई स्वास्थ्य र खकार परिक्षण गराऔँ“ भन्ने जनचेतनामूलक नाराका साथ आयोजना गरिएको यस कार्यक्रममा स्थानीय विद्यालयका शिक्षक, विद्यार्थी तथा समुदायका प्रतिनिधिहरूको सहभागीता रहेको थियो ।

कार्यक्रम विद्यालय तहमै क्षयरोग सम्बन्धी चेतना फैलाउने, प्रारम्भिक लक्षणबारे जानकारी दिने, रोगको पहिचान, उपचार र संक्रमण नियन्त्रणका उपायहरूबारे अवगत गराउने उदेश्यले संचालन गरिएको थियो ।

कार्यक्रममा नेपाल क्षयरोग निवारण संस्था धादिङ शाखाका सभापति चन्द्र बहादुर लम्साल, सचिव बलराम खत्रि, कार्य समितिका सदस्य केशरी पन्त र डाक्टर प्रेमराज फुयालले सहजीकरण गर्नु भएको थियो । कार्यक्रममा क्षयरोगको कारण, लक्षण, सर्ने तरिका, रोकथाम तथा उपचार सेवाबारे विस्तृत जानकारी दिँदै सचेत रहन सबैलाई आह्वान गरिएको छ ।

धादिङ जिल्लामा अझै पनि क्षयरोगका बिरामीहरू गोप्य रूपमा बस्ने, उपचारमा ढिलाइ गर्ने वा लक्षणलाई बेवास्ता गर्ने प्रवृत्ति देखिएकाले विद्यालयस्तरमै यस्तो अभिमुखिकरण कार्यक्रम आवश्यक भएको आयोजक संस्थाले जनाएको छ ।

कार्यक्रमले विद्यार्थीहरूमा क्षयरोगको विषयमा सकारात्मक सोच विकास गर्न मद्दत गरेको र उनीहरूलाई आफ्ना परिवार तथा समुदायमा पनि जानकारी प्रवाह गर्ने दूतको रूपमा तयार पार्ने अपेक्षा लिइएको छ ।

धादिङको दुर्गम भेगमा समेत स्वास्थ्य सम्बन्धी सचेतना कार्यक्रम सञ्चालन गर्दै आएको नेपाल क्षयरोग निवारण संस्था जिल्ला कार्य समिति धादिङले आगामी दिनमा अन्य विद्यालयहरूमा पनि यस्ता कार्यक्रमलाई निरन्तरता दिने जनाएको छ ।

सोहि कार्यक्रमको अवसरमा पारेर क्षयरोग निवारण संस्था जिल्ला कार्यसमिति धादिङले उक्त बिद्यालयमा जुनियर नाटा समेत गठन गरेको छ । कृष्मा थापामगर अध्यक्षतामा १३ सदस्यिय जुनियर नाटा गठन गरिएको शाखाका सभापती चन्द्र बहादुर लम्सालले जानकारी दिनु भयो ।