सल्लाघारी बनमा बन डढेलो तथा आगलागी नियन्त्रण सम्बन्धी कृत्रिम घटना अभ्यास

धादिङबेशी ।  नीलकण्ठ नगरपालिका वडा नम्बर ९ स्थित सल्लाघारी लहरेपाखा सामुदायिक बनमा बन डढेलो तथा आगलागी नियन्त्रण सम्बन्धी कृत्रिम घटना अभ्यास गरिएको छ ।

मंगलबार सशस्त्र प्रहरी बल आश्रित गुल्म धादिङबेसीले नेपाल प्रहरी,नेपाली सेना, स्थानीय उपभोक्ता, स्थानीय सरकार, डिभिजन बन कार्यालय लगायतका निकायसँग समन्वय गरेर बन डढेलो तथा आगलागी नियन्त्रण गर्ने संयुक्त कृत्रिम अभ्यास प्रदर्शन गरेको हो ।

डढेलोलाई संयुक्त रुपमा कसरी नियन्त्रण गर्न सकिन्छ भन्ने स्पष्ट हुनेगरि कृत्रिम घटना अभ्यास गरिएको सशस्त्र प्रहरी बल आश्रित गूल्म धादिङबेसीका प्रहरी नायव उपरिक्षक लक्ष्मी थपलियाले बताउनुभयो ।

डढेलो लाग्दा सरकारका निकाय बीचको समन्वय र सहकार्यले बनडढेलो तथा आगलागी नियन्त्रण गर्न सकिने उदाहरण कृत्रिम घटना अभ्यासको क्रममा जानकारी दिइएको थियो ।

प्रमुख जिल्ला अधिकारी सुमन घिमिरेको अध्यक्षतामा भएको कार्यक्रममा नीलकण्ठ नगरपालिका उपप्रमुख दिपक विश्वकर्माको प्रमुख आतिथ्यता रहेको थियो ।