नेत्रावती डवजोङ गाउँपालिकाको वडा तथा पालिका स्तरीय सार्वजनिक सुनुवाई सम्पन्न

धादिङबेशी । नेत्रावती डबजोङ गाउँपालिकाको वडा तथा पालिका स्तरीय सार्वजनिक सुनुवाई कार्यक्रम सम्पन्न भएको छ । शुक्रबार गाउँपालिकाको वडा नं ५ कटुन्जेमा शुशासन, पारदर्शिता र जवाफदेहिताको निमित्त वडा तथा पालिका स्तरीय सार्वजनिक सुनुवाई कार्यक्रम सम्पन्न भएको हो ।

नेत्रावती डवजोङ गाउँपालिकाका अध्यक्ष मेघनाथ रिजालको अध्यक्षतामा भएको कार्यक्रममा जवाफकर्ताको रुपमा प्रमुख प्रशाशकीय अधिकृत हरेराम शाह, वडा अध्यक्ष हरि अधिकारी,शाखा प्रमुखहरुको उपस्थिति रहेको थियो ।  सहभागीहरूले स्थानीय समस्याहरू, सेवा प्रवाहमा देखिएका चुनौतीहरू, र सुशासन प्रवद्र्धनका उपायहरूबारे आफ्ना धारणा र सुझाव र गुनासा राखेका थिए ।

सार्वजनिक सुनुवाई कार्यक्रममा उठाइएका सवालहरूको जवाफ गाउँपालिका अध्यक्ष मेघनाथ रिजाल, प्रमुख प्रशासकीय अधिकृत हरेराम शाह, र वडा नं ५ का अध्यक्ष हरि अधिकारी, शाखा प्रमुखहरुले दिनुभएको थियो । सार्वजनिक सुनुवाई कार्यक्रममा पालिका अध्यक्ष मेघनाथ रिजालले पालिका र वडास्तरमा हुने विकास निर्माण कार्यको पारदर्शिता, बजेट खर्चको जवाफदेहिता, र सेवा प्रवाहमा सुधार ल्याउने उपायहरूबारे आफु प्रतिबद्ध भएर लागीरहेको र सोहि अनुसार कार्य सम्पादन गर्ने प्रतिबद्धता ब्यक्त गर्नु भएको छ ।

सार्वजनिक सुनुवाई कार्यक्रमले जनप्रतिनिधिहरू र स्थानीय बासिन्दाबीचको सम्बन्धलाई अझ बलियो बनाउनुका साथै, पालिकाको काम कारबाहीमा पारदर्शिता र जवाफदेहिता सुनिश्चित गर्न मद्दत पुग्ने अपेक्षा गरिएको छ ।
सार्वजनिक सुनुवाई कार्यक्रम नेत्रावती डवजोङ गाउँपालिकाको आयोजना तथा बिन्दुकेशरा मिडिया प्रा.ली. को समन्वयमा सम्पन्न भएको हो ।