धादिङमा फागुन १३ देखि दादुरा–रुबेला बिरुद्धको खोप अभियान सुरु, २२ हजार २३७ बालबालिकालाई खोप लागाउने लक्ष्य

धादिङ,०१ फागुन ।
धादिङमा फागुन १३ गतेदेखि दादुरा–रुबेला रोग बिरुद्धको खोप अभियान सुरु हुँदैछ । ९ महिना देखि ५ वर्ष मुनिका सम्पुर्ण बालबालिकाहरुलाइ फागनु १३ देखि चैत ७ गतेसम्म दुइ चरणमा खोप अभियान संचालन हुने भएको हो ।

धादिङमा पहिलो चरणमा फागुन १३ गतेदेखि १९ गतेसम्म धुनिबेसी नगरपालिका, खानियाबास, गंगाजमुना, त्रिपुरासुन्दरी, गजुरी, गल्छी, बेनिघाट रोराङ र थाक्रे गा.पा. मा संचालन हुनेछ भने दोस्रो चरणको अभियान फागुन २२ देखि २८ गतेसम्म निलकण्ठ नगरपालिका, ज्वालामुखी गाउँपालिका, सिद्धलेक र नेत्रावती डबजोङ गाउँपालिकमा संचालन हुने नगरपालिकाका स्वास्थ्य संयोजक विष्णु रिजालले जानकारी दिनुभयो ।

सामेबार धादिङबेसीमा सम्पन्न पालिका खोप समन्वय समिति, संचारकर्मी र सरोकारवालाहरु सँग छलफल तथा अन्तरक्रिया कार्यक्रममा जिल्लाका २२ हजार २ सय ३७ बालबालिकालाई खोप लगाईने लक्ष्य रहेको नीलकण्ठ नगरपालिकाका स्वास्थ्य संयोजक विष्णु रिजालले जानकारी दिनुभयो ।

जिल्लाका २ सय २१ वटा नियमित खोप केन्द्रबाट खोप अभियान सञ्चालन हुने स्वास्थ्य संयोजक रिजालले बताउनुभयो । खोप अभियानका लागि नीलकण्ठ नगरपालिकामा २१ जना स्वास्थ्यकर्मी, ४२ जना स्वयंसेवक र १५ जनाले एइएफआईको अनुगमन गर्ने चिकित्सकको टोली रहने रिजालको भनाइ छ ।

कार्यक्रममा नीलकण्ठ नगरपालिकाका प्रमुख प्रशासकिय अधिकृत पुरुषोत्तम सुवेदीले नगरपालिकाले दादुरा रुबेला रोग विरुद्धको खोप अभिायनलाई तिव्र रुपमा लैजाने बताउनुभएको छ ।

नेपालबाट सन् २०२६ सम्म दादुरा–रुबेला रोग निवारण गर्ने लक्ष्यका साथ राष्ट्रव्यापी रुपमा यो अभियान सञ्चालन हुँदैछ ।