चिसो बढे पनि धादिङमा डेंगी संक्रमण अझै घटेन, आज १८ संक्रमित थपिए

धादिङ,०१ मंसिर ।
गर्मी याममा किटाणुहरुको फैलावट सहज हुने भएकाले धेरै मानिस डेंगीका बिरामी हुन्छन् । तातोपनका कारण खानेकुरामा संक्रमण बढ्दा पनि वर्षा याममा बिरामी बढी हुने गर्दछन् । चिसो बढे पछि बिरामी घट्ने भनिएता पनि धादिङमा डेगी संक्रमण अझै घटेको छैन ।

गत साउन यता धादिङमा १ हजार २५५ जना पुरुष र १ हजार ८१ जना महिला गरी २ हजार ३ सय ३६ जनामा डेंगी संक्रमण पुष्टि भइसकेको छ। यस्तै पछिल्लो २४ घण्टामा १८ जनामा संक्रमण पुष्टि भएको स्वास्थ्य कार्यालय धादिङले जनाएको छ । स्वास्थ्य कार्यालय धादिङका अनुसार नीलकण्ठ नगरपालिकाका ८ जना, सिद्धलेक र ज्वालामुखी गाउँपालिकाका २/२ जना गरी १८ जनामा पुष्टि भएको हो ।

जिल्लामा कुल संक्रमति मध्ये सबै भन्दा धेरै संक्रमित नीलकण्ठ नगरपालिमा रहेका छन् भने खनियाबास गाउँपालिकामा सबै भन्दा कम संक्रमित रहेका छन् । जम्मा संक्रमित मध्ये १०२ जनाको ठेगाना खुलेको छैन भने ९ जना अन्य जिल्लामा परिक्षण गरिएको स्वास्थ्य कार्यालय धादिङले जनाएको छ ।