प्रवासी नेपाली मञ्च मकाउको अध्यक्षमा रोजन लामा

मकाउ । प्रवासी नेपाली मञ्च मकाउको चौथो राष्ट्रिय अधिवेशन बुधबार मकाउस्थित एशियन फुड रेस्टुरेन्टमा सम्पन्न भएको छ। अधिवेशनले रोजन लामाको अध्यक्षतामा नयाँ कार्यसमिति सर्वसम्मत रूपमा चयन गरेको छ।

अधिवेशनबाट उपाध्यक्षमा खम्बराज केसी, सचिवमा अमृत गौतम तथा उपसचिवमा सरोज शर्मा वली र सुरेश थापा निर्वाचित भएका छन्।

त्यसैगरी कार्यसमिति सदस्यमा हर्कराज गुरुङ, नवराज लम्साल, सम्झना भुषाल, उदय मानन्धर, दिपेश उप्रेती र रोहित लामिछाने निर्वाचित भएका छन्।

नवनिर्वाचित कार्यसमितिलाई प्रवासी नेपाली मञ्च मकाउका सदस्य तथा शुभेच्छुकहरूले बधाई दिँदै सफल कार्यकालको शुभकामना व्यक्त गरेका छन्।

नयाँ नेतृत्वले मकाउमा रहेका नेपालीहरूको हकहित, आपसी एकता र सहयोग अभिवृद्धि गर्नुका साथै नेपाली भाषा, संस्कृति र पहिचानको संरक्षण तथा प्रवर्द्धनका लागि सक्रिय भूमिका निर्वाह गर्ने अपेक्षा गरिएको छ।