कांग्रेस महाधिवेशन प्रतिनिधिमा धादिङ–२ बाट युवा अश्विन दुवाडीको उम्मेदवारी

धादिङ,१३ असोज
नेपाली कांग्रेसको १५औँ महाधिवेशन–२०८३ अन्तर्गत धादिङ प्रतिनिधिसभा क्षेत्र नम्बर २ बाट युवा नेता अश्विन दुवाडीले महाधिवेशन प्रतिनिधिका लागि उम्मेदवारी दिनुभएको छ।३५ वर्षमुनिका युवा खुलातर्फ महाधिवेशन प्रतिनिधिका रूपमा उम्मेदवारी दिनुभएका दुवाडीले कांग्रेसमा युवा पुस्ताको सक्रिय सहभागिता, नेतृत्व विकास र निर्णय प्रक्रियामा युवाको अर्थपूर्ण उपस्थितिलाई आफ्नो मुख्य प्राथमिकताका रूपमा अघि सार्नुभएको छ।

दुवाडीले आफ्नो उम्मेदवारीसँगै ‘परम्पराको सम्मान, परिवर्तनको संकल्प, सबल कांग्रेस निर्माणको अभियान’ भन्ने मूल नारालाई अघि सार्नुभएको छ। कांग्रेसले लामो समयदेखि निर्माण गरेको राजनीतिक विरासत र योगदानलाई सम्मान गर्दै बदलिँदो राजनीतिक परिवेशअनुसार पार्टी संगठनलाई थप गतिशील र प्रभावकारी बनाउन युवा पुस्ताको भूमिका आवश्यक रहेको उहाँको धारणा छ।

दुवाडीले कांग्रेसको संगठनलाई समयअनुकूल बनाउन युवा पुस्ताको ऊर्जा, नयाँ सोच, प्रविधिको प्रयोग र सिर्जनशीलतालाई पार्टीको मूलधारसँग जोड्नुपर्ने बताउनुभएको छ।युवालाई केवल पार्टीका गतिविधिमा सहभागी गराउनेभन्दा पनि नीति निर्माण, संगठन सञ्चालन र नेतृत्व विकासको प्रक्रियामै उनीहरूको भूमिका सुनिश्चित गर्नुपर्ने उहाँको धारणा छ। त्यसका लागि आफूले महाधिवेशन प्रतिनिधिको भूमिकामार्फत युवाको आवाजलाई पार्टीको नीति तथा नेतृत्व तहसम्म पुर्‍याउने प्रतिबद्धता व्यक्त गर्नुभएको छ। कांग्रेसको परम्परा र राजनीतिक योगदानलाई निरन्तरता दिँदै नयाँ पुस्ताको सोच र आवश्यकतालाई पार्टी संगठनसँग जोड्न सके कांग्रेसलाई थप सबल र समयसापेक्ष बनाउन सकिने दुवाडीको विश्वास छ।

दुवाडीले युवाको नेतृत्व विकाससँगै पार्टी संगठनलाई प्रविधिमैत्री र आधुनिक कार्यशैलीमा अघि बढाउने विषयलाई पनि आफ्नो प्राथमिकतामा राख्नुभएको छ।
बदलिँदो सामाजिक तथा राजनीतिक परिवेशमा कांग्रेसको संगठनलाई पुरानै शैलीमा मात्र सञ्चालन गर्न नसकिने भन्दै उहाँले नयाँ पुस्तासँग जोडिन सूचना प्रविधि र आधुनिक सञ्चार माध्यमको प्रभावकारी प्रयोग आवश्यक रहेको बताउनुभएको छ।उहाँका अनुसार युवाको ठूलो हिस्सा पार्टीको परम्परागत संगठनात्मक संरचनासँग जोडिन चाहिरहेको भए पनि उनीहरूको अपेक्षा, सोच र सहभागिताको शैली परिवर्तन हुँदै गएको छ। त्यसैले युवाको बदलिँदो चाहनालाई सम्बोधन गर्दै पार्टीलाई थप खुला, सक्रिय र जनमुखी बनाउनुपर्ने आवश्यकता छ।

धादिङ–२ मा कांग्रेसको महाधिवेशन प्रतिनिधि चयनको प्रक्रिया अघि बढिरहेका बेला युवा पुस्ताबाट प्रतिनिधित्वको विषय पनि चर्चामा आएको छ। यही परिवेशमा दुवाडीको उम्मेदवारीले पार्टीको आगामी नेतृत्व निर्माणमा युवाको भूमिकाबारे बहसलाई थप अगाडि ल्याएको छ।दुवाडीले आफ्नो उम्मेदवारीलाई व्यक्तिगत राजनीतिक आकांक्षाभन्दा पनि नयाँ पुस्ताको प्रतिनिधित्व र संगठनमा युवाको भूमिका स्थापित गर्ने अभियानका रूपमा प्रस्तुत गर्नुभएको छ।कांग्रेसको लामो राजनीतिक इतिहास, अग्रज नेताहरूको योगदान र पार्टीले निर्माण गरेको संगठनात्मक आधारलाई सम्मान गर्दै त्यसलाई नयाँ पुस्ताको ऊर्जा र क्षमतासँग जोड्नुपर्ने उहाँको भनाइ छ। दुवाडीको उम्मेदवारीले धादिङ–२ को कांग्रेसभित्र नयाँ पुस्ताको प्रतिनिधित्वको विषयलाई थप चर्चामा ल्याएको छ।

दुवाडीले आफ्नो उम्मेदवारीका लागि कांग्रेसका नेता, कार्यकर्ता तथा महाधिवेशन प्रतिनिधिहरूसँग संवाद र सहकार्यलाई प्राथमिकता दिने बताउनुभएको छ। पार्टीको संगठनलाई बलियो बनाउने, युवालाई नेतृत्वको मूलधारमा ल्याउने र कांग्रेसलाई समयअनुकूल बनाउने आफ्नो अभियानमा सहयोग र समर्थनको अपेक्षा उहाँले गर्नुभएको छ।कांग्रेसको १५औँ महाधिवेशनबाट पार्टीको आगामी नेतृत्व र राजनीतिक दिशासहित संगठनमा पुस्तान्तरणको बहससमेत अगाडि बढिरहेका बेला धादिङ–२ बाट युवा खुलातर्फ दुवाडीको उम्मेदवारीलाई त्यही बहससँग जोडेर हेरिएको छ।