सिद्धलेक गाउँपालिकामा निशुल्क दन्त परिक्षण शिविर संचालन

धादिङ,११ असार । सिद्धलेक गाउँपालिकामा निशुल्क दन्त परिक्षण शिविर एवंम स्वास्थ्य सर–सफाई तथा शैक्षिक सामाग्री वितरण र बृक्षारोपण कार्यक्रम सम्पन्न भएको छ । गाउँपालिकाको वडा नं ७ स्थित महाकाली माध्यामिक विद्यालयमा उक्त कार्यक्रम सम्पन्न भएको हो ।

कार्यक्रम लायन्स क्लब अफ काठमाडौँ भृकुटीको आयोजना सिद्धलेक गाउँपालिकाको समन्वय तथा गुडलक सर्जिकल एण्ड डेन्टल, गुर्जुधारा डेन्टल केयर, मिसन डेन्टल र जेडी डेन्टलको सहयोगमा भएको हो ।

शिविरमा कक्षा १ देखि १२ सम्म अध्ययनरत विद्यार्थीहरूको दन्त परीक्षण गरिएको थियो । साथै कक्षा १ देखि ५ सम्मका विद्यार्थीलाई स्वास्थ्य सर–सफाइ सामग्री (ब्रस, मञ्जन) तथा शैक्षिक सामग्री वितरण गरिएको छ । सो अवसरमा विद्यालय परिसरमा वृक्षारोपण कार्यक्रम पनि सञ्चालन गरिएको थियो ।

सिद्धलेक गाउँपालिकाका अध्यक्ष परशुराम खतिवडाले यस्तो प्रकारका कार्यक्रमहरू बालबालिकाको स्वास्थ्य र सिकाइ दुवैका लागि सहयोगी हुने भन्दै लायन्स क्लब अफ काठमाडौँ भृकुटीलाई धन्यवाद व्यक्त गर्नुभयो । गाउँपालिकाले शिक्षा र स्वास्थ्यलाई उच्च प्राथमिकतामा राखेको अध्यक्ष खतिवडाले बताउनुभयो ।

त्यसैगरी सिद्धलेक गाउँपालिकाका उपाध्यक्ष सबिता अर्यालले यस किसिमको कार्यक्रम गर्न स्थानिय सरकारको दायित्व भएतापनि सिमित श्रोत र साधनको अभावले गर्दा कार्यक्रम गर्न नसकिरहेको अवस्थामा सहयोगी हातहरुले यस किसिमको कार्यक्रम गर्नु भएकोमा धन्यावाद प्रकट गर्नु भयो । उहाँले दन्त शिविरमा काउन्सिलिङ र रिफरका केसहरुको फलोअप गर्नुपर्ने कुरामा ध्यान  दिन जोड दिनु भएको थियो ।

लायन्स क्लब अफ काठमाडौँ भृकुटीको अध्यक्ष लायन पार्वती कोइराला खतिवडाको अध्यक्षतामा भएको कार्यक्रममा गाउँपालिका अध्यक्ष परशुराम खतिवडाको प्रमुख आतिथ्यता तथा उपाध्यक्ष सविता अर्याल, वडा नं ७ का वडाअध्यक्ष सानो गिरीको विषेश आतिथ्य रहेको थियो ।