नेत्रावती डबजोङमा व्यवसायिक मौरी पालन सम्बन्धि तालिम सम्पन्न

धादिङ, १२ जेठ ।
धादिङको नेत्रावती डबजोङ गाउँपालिकामा व्यवसायिक मौरी पालन सम्बन्धि १५ दिने तालिम सम्पन्न भएको छ । गाउँपालिकाको आयोजनामा वडा नं. १, ४ र ५ मा गृहिणी महिला सशक्तिकरण कार्यक्रम अन्तर्गत संचालित व्यवसायिक मौरी पालन तालिम सम्पन्न भएको हो ।

तालिममा सहभागी गृहिणी महिलाहरुलाई मौरी सहितको घार वितरण गरिएको थियो । त्यसैगरी वडा नं. २ मा भएको फलफुल बगैंचा व्यवस्थापन सम्बन्धी १० दिने तालिम सम्पन्न भए संगै उक्त तालिममा सहभागी गृहिणी महिलाहरुलाई विषादी पम्प र कैंची वितरण गरिएको थियो ।

गाउँपालिका अध्यक्ष मेघनाथ रिजालका अनुसार “गृहिणी महिलाहरूको आर्थिक अवस्था सुधार गर्दै उनीहरूलाई आत्मनिर्भर बनाउन यस्ता तालिमहरू अत्यन्त उपयोगी हुनेछन् । गाउँपालिकाले आगामी दिनमा पनि यस्ता व्यावसायिक तालिमहरूलाई प्राथमिकतामा राख्दै निरन्तरता दिनेछ।”

गाउँपालिकाले महिला सशक्तिकरण, कृषि विकास, साना उद्यम प्रवद्र्धन, सीप विकास तथा रोजगारी सिर्जनाका लागि विभिन्न तालिम तथा कार्यक्रमहरू सञ्चालन गर्दै आएको छ।