मौरीडाँडामा आमा समूहको भवन उद्घाटन, जेष्ठ नागरिक तथा अपाङ्गता भएकाहरूलाई सम्मान

सुनौलाबजार, २० बैशाख । धादिङको नीलकण्ठ नगरपालिका वडा नम्बर ६ मौरीडाँडामा भैरवी आमा समूहको भवन उद्घाटन गरिएको छ । शुक्रबार एक कार्यक्रमको बिच आमा समुहको भवन नीलकण्ठ नगरपालिकाका उप प्रमुख दिपक बिश्वकर्माले उद्घाटन गर्नु भएको हो ।

सो अवसरमा आमा समुहका सदस्यहरुलाई पोसाक र परिचयपत्र बितरण गर्नुको साथै ज्येष्ठ नागरिक तथा अपाङ्गता भएका ब्यक्तिहरुलाई सम्मान गरिएको छ ।

कार्यक्रमलाई सम्बोधन गर्नुहुँदै प्रमुख अतिथि समेत रहनुभएका नीलकण्ठ नगरपालिकाका उप प्रमुख दिपक विश्वकर्माले आमा समुहका सदस्यहको हक अधिकारको निमित्त आफु सधै प्रतिवद्धरहेको बताउनु भयो । कार्यक्रममा उप–प्रमुख बिश्वकर्माले बिगतमा पनि आफुले सहयोग गर्दै आएको र आगामी दिनमा पनि आफुले सक्ने सहयोग गर्ने बताउनु भयो । उहाले हाल धादिङदेखी फोस्रेटार जाने सडकलाई मुकुन्दशेन स्मृति मार्ग नामाकरण गरिएको समेत जानकारी गराउनु भएको थियो ।

आमा समूहको अध्यक्ष तारा बसेल नेपालीको अध्यक्षतामा सम्पन्न भएको उद्घाटन समारोहमा वडा नम्बर ६ का वडा अध्यक्ष भूपेन्द्र कुमार श्रेष्ठ, कार्यपालिका सदस्य एवम् आर्थिक समिति संयोजक लक्ष्मण रम्तेल र समाजसेवी भेषराज ठकुरी लगायतको आतिथ्यता रहेको थियो ।