ज्वालामुखी गाउँपालिकाको अग्रसरताः स्वच्छता र खानेपानी व्यवस्थापनमा नवीनतम प्रयास

धादिङ, २३ फागुन ।
धादिङको ज्वालामुखी गाउँपालिकाले स्वच्छता प्रवद्र्धन र सुरक्षित खानेपानी व्यवस्थापनमा नवीनतम प्रयास अघि सार्दै ग्रामीण क्षेत्रका नागरिकहरूको जीवनस्तर उकास्ने महत्त्वपूर्ण कदम चालेको छ।

गाउँपालिकाले खानेपानी, सरसफाई तथा स्वच्छता विषयक विशेष कार्यक्रम सम्पन्न गरेको छ । स्थानीय सरकारको नेतृत्वमा सम्पन्न विशेष कार्यक्रममा खानेपानी, सरसफाई, र स्वच्छता व्यवस्थापनलाई प्रभावकारी बनाउन विभिन्न रणनीति तथा आगामी योजनाहरूको छलफल गरिएको हो।

गाउँपालिका अध्यक्ष यामनाथ दनैको अध्यक्षतामा सम्पन्न कार्यक्रममा उपाध्यक्ष धर्म बहादुर अर्याल, प्रमुख प्रशासकीय अधिकृत सुरेश थापा, स्वास्थ्य शाखा प्रमुख सुजन श्रेष्ठ, कार्यपालिका सदस्यहरू, डुल्लु नगरपालिका वडा नं-१२ को वडा अध्यक्ष, लेकबेशी नगरपालिकाका उपमेयर, खानेपानी सरसफाई स्वच्छता समन्वय समितिका अध्यक्ष, हेल्भेटास नेपालको प्रतिनिधि लगायत विभिन्न पदाधिकारीहरूको उपस्थिति रहेको थियो।

कार्यक्रममा ज्वालामुखी ग्रामीण खानेपानी सरसफाई तथा स्वच्छता व्यवस्थापन बोर्डले हालसम्म गरेका कार्यहरू, ती कार्यहरूको प्रभाव, तथा आगामी योजनाहरूको विस्तृत समीक्षा गरिएको थियो ।

डुल्लु नगरपालिका र लेकबेशी नगरपालिकाका उपमेयरको नेतृत्वमा आएको ३० सदस्यीय टोलीले ज्वालामुखी गाउँपालिकाको स्वच्छ गाउँ अभियान तथा खानेपानी व्यवस्थापन बोर्डको कार्यहरू अवलोकन गरेको थियो। टोलीले गाउँपालिकाको स्वच्छता अभियान, खानेपानी व्यवस्थापन, हालसम्मको प्रगति, तथा कार्यकर्ताहरूको भूमिकाबारे जानकारी लिँदै सिकाइ तथा अनुभव आदानप्रदान गरेको छ। साथै, अन्य स्थानहरूमा यस्ता कार्यक्रम सञ्चालन गर्ने विषयमा पनि छलफल भएको छ।

ज्वालामुखी गाउँपालिकाले ग्रामीण खानेपानी सरसफाई तथा स्वच्छता व्यवस्थापन बोर्ड स्थापना गर्दै नमुना सफा गाउँको अवधारणा अघि सारेको छ। यसै सन्दर्भमा, ज्वालामुखी वडा नं. ६ मा सञ्चालित गौरीगाउँ होमस्टे अध्ययन, अनुसन्धान तथा अवलोकन गर्न आउनेहरूको संख्यामा वृद्धि भइरहेको स्वास्थ्य शाखा प्रमुख सुजन श्रेष्ठले जानकारी दिनुभयो।

कार्यक्रममा सहभागीहरूले ज्वालामुखी गाउँपालिकाद्वारा सञ्चालित सरसफाई अभियान तथा खानेपानी व्यवस्थापनमा भएको उल्लेखनीय सुधारको प्रशंसा गर्दै अन्य क्षेत्रहरूमा पनि यस्ता उदाहरणीय अभ्यासहरू लागू गर्न आवश्यक रहेको बताएका छन्। कार्यक्रमले सरसफाई, खानेपानी व्यवस्थापन तथा स्वच्छता प्रवद्र्धनमा महत्वपूर्ण योगदान पु¥याउने अपेक्षा गरिएको छ।

ज्वालामूखी खानेपानी, सरसफाई, तथा स्वच्छता व्यवस्थापन वोर्डको अध्ययन अवलोकन र सिकाई अनुभव आदान प्रदान कार्यक्रमका लागि दुल्लु र लेकबेसी नगरपालिकाको उपप्रमुखको अगुवाईमा हेल्भेटास नेपालको सहकार्यमा ज्वालामूखी गाउँपालिकाको भ्रमणका लागि आउनु भएको थियो।