कक्षा १२ को ग्रेडवृद्धि (पूरक) परीक्षाको नतिजा सार्वजनिक

काठमाडौँ – कक्षा १२ को ग्रेडवृद्धि (पूरक) परीक्षाको नतिजा सार्वजनिक भएको छ। राष्ट्रिय परीक्षा बोर्डले गत भदौ २५ र २६ गते सम्पन्न पूरक परीक्षाको नतिजा घोषणा गरेको हो।

प्रकाशित नतिजाअनुसार, ७०.६ प्रतिशत अर्थात् ८६,२४६ जना विद्यार्थीले सबै विषयमा ग्रेड प्राप्त गरेका छन्। कुल एक लाख २२,१७१ जना विद्यार्थीले ग्रेडवृद्धिका लागि परीक्षा दिएका थिए। यसमा दुई विद्यार्थीको परीक्षा रद्द गरिएको र तीन विद्यार्थीको परीक्षाफल स्थगित गरिएको छ।

प्रत्येक विषयको सैद्धान्तिक परीक्षामा कम्तिमा डी ग्रेड प्राप्त गरेका परीक्षार्थीले नतिजा प्रकाशन भएको मितिले सात दिनपछि ट्रान्सक्रिप्ट, माइग्रेसन, प्रोभिजनल, र पूरक प्रमाणपत्रका लागि रसिद काट्न सक्ने बोर्डले जानकारी दिएको छ। यदि परीक्षार्थीलाई पूरक परीक्षाको नतिजा चित्त नबुझेको खण्डमा पुनर्योगका लागि १५ दिनभित्र आवेदन दिनुपर्ने छ।