धादिङका योग साधना केन्द्रहरुमा स्वास्थ्य जाँच तथा मटुरोग बारे परामर्श

धादिङ, ११ असोज ।
धादिङबेशीमा रहेका योग साधना केन्द्रहरुमा स्वास्थ्य जाँच तथा मुटु रोग बारे परामर्श कार्यक्रम गरिएको छ । हर्ट फाउन्डेशन धादिङको आयोजनामा विश्व मुटु दिवस २०२४ को अवसरमा स्वास्थ्य जाँच तथा परामर्श गरिएको हो ।

शुक्रबार धादिङवेसी बजारमा रहेका पतंजलि योग समिति धादिङ राधाकृष्ण योग साधना केन्द्र, वगैंचा योग साधना केन्द्र र सित्तलबजार योग साधना केन्द्रमा सुगर, रक्तचाप जाँच तथा मुटुरोगको बारेमा परामर्श प्रदान गरिएको हो ।

राधाकृष्ण योग साधना केन्द्र र नारायणस्थान योग साधना केन्द्र विचबजारमा डा. दिनेश रेग्मी तथा धादिङ हर्ट फाउण्डेशनका सचिव विष्णुलाल श्रेष्ठको नेतृत्वमा, स्वास्थ्य कर्मीहरु जुनु श्रेष्ठ, अनिता सेंडाई ढकाल, सुमित्रा श्रेष्ठको सहभागितामा मुटुरोगको बारेमा परामर्श प्रदान गरिएको थियो । जसमा ७१ जनाको सुगर र रक्तचाप जाँच गरिएको हर्ट फाउण्डेशन धादिङका सभापति राजकुमार श्रेष्ठले जानकारी दिनुभयो ।

त्यसैगरी बगैंचा योग साधना केन्द्रमा डा. विवेक भण्डारी तथा धादिङ हर्ट फाउण्डेशनका निः सभापति कृष्णलाल उप्रेतिको नेतृत्वमा, स्वास्थ्य कर्मीहरु अर्जनभक्त श्रेष्ठ, सुदिप ठकुरी, तथा हर्ट फाउण्डेशन धादिङका आजिवन सदस्य यम बहादुर श्रेष्ठको सहयोग तथा सहभागितामा मुटुरोगको बारेमा परामर्श दिनुका साथै ४७ जनाको सुगर र रक्तचाप जाँच गरिएको छ ।

त्यस्तै सित्तल बजार योग साधना केन्द्रमा डा. रामचन्द्र रिजाल तथा धादिङ हर्ट फाउण्डेशनका उप–सभापति शान्तविक्रम वानियाँको नेतृत्वमा, स्वास्थ्यकर्मीहरु रिकिना बुढाथोकी, संरचना कडेल, तथा हर्ट फाउण्डेशन धादिङका सदस्य भेषराज ठकुरीको सहयोग तथा सहभागितामा मुटुरोगको बारेमा परामर्श कार्यक्रम गरिएको थियो । जसमा ३७ जनाको सुगर र रक्तचाप जाँच गरिएको श्रेष्ठले बताउनुभयो ।

श्रेष्ठका अनुसार विश्व मुटु दिवसको अवसरमा असोज ११, १२, १३ गते त्रिदिवसिय कार्यक्रम अन्तरगत आज पहिलो दिन तीन वटा साधना केन्द्रमा स्वास्थ्य परिक्षण गरिएको हो ।

साथै हर्ट फाउण्डेशन धादिङले आज नीलकण्ठ नगरपालिका भित्रका सामुदायिक तथा संस्थागत माध्यामिक विद्यालय स्तरको विद्यार्थीहरूलाई नीलकण्ठ क्याम्पसमा उपस्थित गराई मुटुरोगको अवस्था र नियन्त्रणमा हाम्रो भुमिका विषयक निवन्ध प्रतियोगिता समेत आयोजना गरेको छ ।