नीलकण्ठ ४ पौवामा आत्महत्या रोकथाम तथा सचेतना सम्बन्धी अन्तरक्रिया सम्पन्न

धादिङ,२५ भदौ ।
विश्व आत्महत्या रोकथाम दिवसको अवसरमा नीलकण्ठ नगरपालिकामा मनोसामाजिक सुस्वास्थ्य तथा आत्महत्या रोकथाम सम्बन्धी अन्तरक्रिया कार्यक्रम सम्पन्न भएको छ । नीलकण्ठ नगरपालिका वडा नम्बर ४ को आयोजनामा विश्व आत्महत्या रोकथाम दिवसको अवसरमा सरोकारवाला निकायहरुबिच अन्तरक्रिया कार्यक्रम सम्पन्न भएको हो । कार्यक्रममा वडा सदस्यहरु,वडा भित्र रहेका विद्यालयका प्रधानाध्यापकहरु,सामाजिक शिक्षक,टोल सुधार समितिका अध्यक्ष,सहकारीका अध्यक्ष लगायत पार्टी प्रतिनिधिहरुको सहभागिता रहेको थियो ।

नीलकण्ठ नगरपालिका वडा नम्बर ४ मा आत्महत्याको दर बढ्दै गएकोले यस्तो सचेतना मुलक कार्यक्र सन्चालन गरीएको वडा नम्बर ४ का वडा अध्यक्ष हरि बहादुर श्रेष्ठले जानकारी दिनुभयो । वडा नम्बर ४ मा विगत ५ महिनामा ६ जनाले आत्महत्या गरेका छन् । वडा नम्बर ४ का वडा अध्यक्ष हरि बहादुर श्रेष्ठको अध्क्षतामा सम्पन्न भएको कार्यक्रममा सामी कार्यक्रम संयोजक दिनेश दुवाडी,मनोसामाजिक परामर्शकर्ता रामकुमार थापा,वडा सदस्यहरु,विविभन्न पार्टीका प्रतिनिधि लगायतको आतिथ्यता रहेको थियो ।

आत्महत्याका घटना बढ्दै गएको भन्दै त्यस्ता घटनाको रोकथामका लागि सचेतना फैलाउने उदेश्यले सरोकारवालाको उपस्थितमा सचेतना तथा अन्तरक्रिया कार्यक्रम गरिएको वडा अध्यक्ष श्रेष्ठले बताउनुभयो । कार्यक्रममा सामी कार्यक्रम संयोजक दिनेश दुवाडीले आत्महत्याको वर्तमान अवस्था,जिल्ला र नगरपालिको अवस्था,आत्महत्या दुरुत्साहन सम्बन्धी कानुनी सचेतना तथा सामी कार्यक्रमले गरीरहेको कार्यको विषयमा जानकारी गराउनु भएको थियो । यसैगरी नीलकण्ठ नगरपालिकाका मनोसामाजिक परामर्शकर्ता रामकुमार थापाले मानसिक स्वास्थ्य, आत्महत्या भनेको के हो?यसको लक्षण, आत्महत्या गर्नुको कारण, रोकथामका उपाय र चुनौतीको वारेमा सहजिकरण गर्नुभएको थियो ।

उहाँले मानसिक तथा मनोसामाजिक समस्यासँगै भ्रम, लाल्छना, जनचेतनाको कमी, बेरोजगारी,बैदेशिक रोजगारी,घरेलु हिंसा,लागुपदार्थको प्रयोग लगायतको कारणले आत्महत्याका घटना बढ्दै गएको अवस्थामा आत्महत्या रोकथामको लागि सवैको सहकार्य आवश्यक रहेको बताउनुभयो । साथै थापाले आत्महत्या गर्ने व्यक्तिहरुले देखाउने लक्षण,परिवार र समाजले खेल्नुपर्ने भुमिका लगायतको विषयमा जानकारी गराउनु भएको थियो ।यसैगरी सहभागीहरुले यस्तो कार्यक्रमहरु विद्यालय स्तर,गाउँ स्तरमा लैजानुपर्ने बताउनु भएको थियो । यसैगरी वडा अध्यक्ष हरि बहादुर श्रेष्ठले आगामी दिनहरुमा यस्ता किसिमका कार्यक्रमहरु गाउँ स्तरमा लैजाने प्रतिबद्धता व्यक्त गर्नुभएको छ । यसैगरी आजै नीलकण्ठ नगरपालिकाको स्वास्थ्य शखाको आयोजनामा स्वास्थ्य स्वयंम सेविका लगायतको उस्थितीमा अन्तररक्रिया कार्यक्रम सम्पन्न भएको छ ।आत्महत्या रोकथामका लागि सचेतना जगाउन हरेक वर्ष सेम्टेम्वर १० का दिन विश्व आत्महत्या रोकथाम दिवस मनाउने गरिन्छ ।