गोरखामा प्रयोगात्मक परीक्षामा पटक पटक फेल गराउने शिक्षालयका प्रशिक्षक रानाभाटलाई जागिरबाट निष्काशन

धादिङबेशी । बिद्यार्थीलाई प्रयोगात्मक परीक्षामा पटक पटक फेल गराउने पालुङटार नगरपालिकाको गोरखा बुहप्राविधिक शिक्षालयका प्रशिक्षक आशिष रानाभाटलाई तत्कालका लागि जागिरबाट निष्काशन गरिएको छ । घटनाबारे छानविन प्रतिवेदन नआएसम्म उनलाई जागिरबाट निष्काशन गर्ने निर्णय गरिएको बताइएको छ ।\

गोरखाका प्रमुख जिल्ला अधिकारी संयोजकत्वको शिक्षालय संचालक समितिको बैठकले छानविन प्रतिवेदन नआएसम्मका लागि रानाभाटलाई शिक्षालयको सबै जिम्मेवारीबाट हटाउन क्याम्पस व्यवस्थापन समितिलाई निर्देशन दिएको हो । हाल माथिबाट आएको सिटिइभिटीको टोलि र जिल्ला प्रशासन कार्यालय दुवैले यस घटनाको छानविन गरिरहेको छ । छानविन प्रतिवेदन आएपछि सोही अनुसार कारवाही प्रक्रिया अघि बढाउने गोरखाका प्रजिअले जानकारी दिनुभयो ।

शिक्षालयमा अध्ययनरत बिद्यार्थी श्यामहरी संग्रौलामाथि बदनियत राखी पटक पटक प्रयोगात्मक परिक्षामा फेल गराएको भन्दै प्रशिक्षक रानाभाटमाथि केही दिन अघि बिद्यार्थी समूहले शिक्षालय परिसरमा अभद्र व्यवहार गरेका थिए । रानाभाटलाई कारवाहीको माग गर्दै उनीहरुले शिक्षालयमा तालावन्दी समेत गरेका छन् । प्रशिक्षक रानाभाटले दिएको जाहेरीको आधारमा केही बिद्यार्थी बिरुद्ध अभद्र व्यवहारको मुद्दा दर्ता भएको छ । सोही बिरोधमा नेपाल बिद्यार्थी संघले बिरोध प्रदर्शन समेत गरेको थियो । बिद्यार्थीबिरुद्धको मुद्दा फिर्ता र शिक्षकलाई कारवाहीको माग गर्दै उनीहरुले हरमटारीचोकमा बिरोध प्रदर्शन गरेका थिए ।

व्यक्तिगत इगो राखि बिद्यार्थीलाई प्रयोगात्मक परीक्षामा पटक पटक फेला गराउने शिक्षकलाई बिभागिय कारवाही गर्नुको सट्टा उल्टै बिद्यार्थीमाथि अभद्र व्यवहारको मुद्वा दर्ता गरिएको भन्दै नेविसंघले बिरोध जनाएको थियो ।