नेत्रावती डबजोङमा बालविकास शिक्षकहरुका लागि क्षमता अभिवृद्धि तालिम सम्पन्न

धादिङ,०१ फागुन ।

नेत्रावती डबजोङ गाउँपालिकामा सामुदायिक विद्यालयका बालविकास शिक्षकहरुका लागि क्षमता अभिवृद्धि तालिम सम्पन्न भएको छ । शिक्षा तालिम केन्द्र, धुलिखेल, काभ्रेपलाञ्चोकको आयोजना र नेत्रावती डबजोङ गाउँपालिकाको समन्वयमा बालविकास शिक्षकहरूका लागि क्षमता अभिवृद्धि सम्बन्धि ५ दिने पुनर्ताजगी तालिम सामेबार सम्पन्न भएको हो ।

तालिममा प्रारम्भिक बालविकास शिक्षाको पाठ्यक्रम, कक्षा कोठा व्यवस्थापन, समावेशी शिक्षाको अवधारणा, सिकाई क्षेत्र, सहजिकरणका तौर तरिका, सिकाई क्षेत्र अनुसारका सामाग्री निमार्ण र प्रयोग, बालबालिकाको सिकाई, व्यवहार लगायतका विषयमा छलफल गरिएको शिक्षा शाखाका प्राविधिक सहायक डोलमाया तामाङले जानकारी दिनुभयो ।

बालविकास शिक्षकहरुको क्षमता अभिबृद्धि गर्ने उद्धेश्यले संचालन गरिएको तालिममा सुशिला ङ्याङजो, सुनिता कापले, सुनिता श्रेष्ठ, धु्रव राज घिमिरेले सहजिकरण गर्नुभएको थियो । तालिममा २६ जना बालविकास शिक्षकहरुको सहभागिता रहेको थियो ।