रुवीभ्याली गाउँपालिकाले स्नातक पढ्नेको शुल्क तिरिदिने, उपचारमा पांच हजार सम्मको नि:शुल्क गराउने तयारी

धादिङबेशी । धादिङको रुबीभ्याली गाउँपालिकाले निलकण्ठ बहुमुखी क्याम्पसमा स्नातक अध्ययन गर्ने पालिकाभरीका सम्पूर्ण विद्यार्थीको शुल्क तिरिदिने भएको छ ।
१४ औं हिउँदे अधिवेशन तथा गाउँ कार्यपालिकाको बैठकको निर्णय अनुसार विभिन्न विषयको संकायमा भर्ना हुने सबै विद्यार्थीको शुल्क पालिकाले तिरिदिने भएको हो ।

निलकण्ठ बहुमुखी क्याम्पसमा स्नातक अध्ययन गर्ने पालिकाभरीका सबै विद्यार्थीलाई निःशुल्क व्यवस्था मिलाइएको पालिका प्रमुख रामसिंह तामाङले बताउनु भयो । ‘कमजोर आर्थिक अवस्थाका कारण उच्च शिक्षा अध्ययनबाट वञ्चित हुन नपरोस् भनेर क्याम्पसमा अध्ययन गर्ने सबै विद्यार्थीको शुल्क पालिकाले तिर्ने निर्णय गरिएको अध्यक्ष तामाङले बताउनु भयो ।

पालिका प्रमुख तामाङले अहिले यस शैक्षिक सत्रका लागि मात्र यस्तो व्यवस्था गरिएको जानकारी दिनुभयो । ‘विद्यार्थीको संख्या हेरेर आगामी आर्थिक वर्ष पनि निःशुल्क अध्यपन कार्यक्रमलाई निरन्तरता दिने–नदिने निर्धारण गरिने उहाँको भनाई छ ।  नीतिगत निर्णय गरेर गाउँपालिकाको कार्यक्रमकै रूपमा पनि आगामी वर्ष पनि निरन्तरता दिने योजना रहेको उहाँले बताउनु भयो ।

त्यसैगरी रुवीभ्याली गाउँपालिकाले धादिङ अस्पताल संगको सहकार्यमा पालिकाका जनतालाई स्थानीय स्वास्थ चौकीमा उपचार हुन नसकेका बिरामीलाई पाँच हजार सम्मको उपचार निःशुल्क गराउने तयारी समेत गरेको पालिका प्रमुख तामाङले नीलकण्ठ एफ.एम.लाई जानकारी दिनु भयो ।