नेत्रावती डबजोङ गाउँपालिकाको सार्वजनिक सुनुवाई कार्यक्रम सम्पन्न

धादिङबेशी । नेत्रावती डबजोङ गाउँपालिका वडा नं १ मार्पाकमा पालिका स्तरीय सार्वजनिक सुनुवाई कार्यक्रम सम्पन्न भएको छ । गाउँपालिकाको आयोजना तथा प्रत्युष नेटवर्क प्रा.लि.को समन्वयमा बिहीबार सार्वजनिक सुनुवाइ कार्यक्रम सम्पन्न भएको हो ।

गाउँपालिकाका अध्यक्ष मेघनाथ रिजालको अध्यक्षतामा सम्पन्न कार्यक्रममा उपाध्यक्ष सिता माया चोदेन, प्रमुख प्रशासकिय अधिकृत हरेराम शाह, पालिकाका प्रवक्ता तथा वडा नं १ वडा अध्यक्ष ठाकुर गुरुङ, वडा नं ३ का वडा अध्यक्ष सुरेश वाईवा, शाखा प्रमुखहरु, कार्यपालिका सदस्यहरु,वडा सदस्यहरु बक्ताको रुपमा आतिथ्यता रहेको थियो ।

आर्थिक वर्ष २०८०/०८१ मा भएका विकास निमार्णका काम, सेवा प्रवाहको विषयमा एक रुपता ल्याउनको लागि, सेवा प्रवाहलाई चुस्त दुरुस्त बनाउन,पालिकामा शुसासन,पारदर्शिता,र जवाफदेहिताको लागी सार्वजनिक सुनुवाई कार्यक्रम आयोजना गरिएको गाउँपालिकाका प्रवक्ता तथा वडा न १ का वडा अध्यक्ष ठाकुर गुरुङले बताउनुभयो । कार्यक्रममा सहभागीहरुले सडक, खानेपानी, शिक्षा, स्वास्थ्य, कृषि, खेलकुद लगायतका विषयमा सवालहरु उठाएका थिए ।

उठेका सवालहरुको जवाफ दिनुहुँदै गाउँपालिकाका प्रमुख प्रशासकिय अधिकृत हरेरराम शाहले गाउँपालिकाको सेवा प्रवाहमा आगामी दिनमा थप चुस्त दुरुस्त बनाउने प्रतिबद्धता व्यक्त गर्नुभएको छ । समृद्ध नेत्रावती डबजोङ बनाउनको लागि स्थानिय नागरिकहरुको भुमिका आवश्यक रहेको भन्दै उहाँले पालिकाको बिकास निर्माणमा साथ र सहयोग गर्नको लागि समेत आग्रह गर्नुभएको छ ।

त्यसैगरी उपाध्यक्ष सितामाया चोदेनले महिला सिमान्तकृत र दलितहरुको लागि विषेश योजना बनाएर कार्य सम्पादन गरिरहेको बताउनु भएको छ । गाउँपालिकाले १ नं वडालाई विषेश प्राथमिकता दिएर काम गरिरहेको उहाँको भनाई छ ।

त्यसैगरी सार्वजनिक सुनुवाई कार्यक्रममा उठेका सवालहरुको सम्बोधन क्रममा गाउँपालिकाका अध्यक्ष मेघनाथ रिजालले निर्वाचन अघि गरेको प्रतिबद्धता पुरा गर्ने गरि गाउँपालिका अघि बढेको बताउनुभएको छ । गाउँपालिकाको विकास निमार्णको लागि संघ र प्रदेशसँग समेत समन्वय गरेर काम गर्ने स्पष्ट पार्नुभयो । आगामी दिन गाउँपालिकाले अभै प्रभावकारी र छिटो छरितो ढंगबाट कार्य सम्पादन गर्ने प्रतिबद्धता व्यक्त गर्नुभएको छ ।