ज्वालामुखी गाउँपालिकाद्धारा नदी/खोलामा विद्युतीय करेन्ट तथा हानिकारक विषादीको प्रयोग बन्द गर्न आग्रह

धादिङबेशी । ज्वालामुखी गाउँपालिकाले नदी/खोलामा विद्युतीय करेन्ट तथा हानिकारक विषादीको प्रयोग बन्द गर्न आग्रह गरेको छ । शुक्रबार एक सुचना जारी गर्दै गाउँपालिका क्षेत्रभित्रका विभिन्न नदि/खोलानालामा विद्युतीय करेन्ट तथा हानिकारक विषादीको प्रयोग बन्द गर्न आग्रह गरेको हो ।

विभिन्न व्यक्ति तथा समुहबाट विद्युतीय करेन्ट तथा हानिकारक विषादीको प्रयोग गरी माछा मार्ने कार्य भए÷गरेको भनी सरोकारवाला व्यक्ति तथा नागरीक समाजबाट जनगुनासो आएको सम्बन्धमा गाउकार्यपालिका कार्यालयको ध्यानाकर्षण भएको सुचनामा भनिएको छ ।

गाउँकार्यपालिका बैठकको निर्णय अनुसार उक्त स्थान तथा क्षेत्रमा प्रतिकुल प्रभाव गर्ने गरी विद्युतीय करेन्ट तथा हानिकारक विषादीको अवैध प्रयोग पुर्ण रुपले बन्द गर्नको लागि गाउँपालिकाले अनुरोध गरेको हो । सुचना विपरीत हुने गरी गतिविधि गरेको पाइएमा प्रचलित कानुन बमोजिम कारबाही गरिने सुचनामा भनिएको छ । साथै यस प्रकारका गतिविधि गरिरहेको पाइएमा नजिकैको प्रहरी चौकी, गाउँ कार्यपालिकाको कार्यालय, वडा कार्यालय एवं जनप्रतिनिधि/पदाधिकारीहरुलाई जानकारी गराउन पनि गाउँपालिकाले अनुरोध गरेको छ ।