प्रसन्न स्वास्थ्य आमा सहकारी संस्थाको नवौँ बार्षिक साधारण सभा सम्पन्न, असल ऋणी, जेष्ठ सदस्य र जग्गा दातालाई सम्मान

धादिङबेशी । नीलकण्ठ नगरपालिका वडा नं ९ स्थित ज्यामिरे भन्ज्याङमा रहेको श्री प्रसन्न स्वास्थ्य आमा सहकारी संस्था लिमिटेडको नवौ साधारण सभा सम्पन्न भएको छ । सहकारी संस्थाका अध्यक्ष अम्बिका दुवाडीको अध्यक्षतमा सम्पन्न साधारण सभामा नीलकण्ठ नगरपालिका वडा नं ९ का वडा अध्यक्ष राजन बराइलीको प्रमुख आतिथ्यता रहेको थियो ।

नेपाल निजामती कर्मचारी युनियनका केन्द्रिय सदस्य तथा मुरली भन्ज्याङ स्वास्थ्य चौकीका भुपु स्वास्थ्य चौकी प्रमुख कृष्ण बद्री पौडेल, नेपाल तरुण दलका केन्द्रिय सदस्य गोपाल विश्वकर्मा, मण्डली महिला सहकारी संस्थाका अध्यक्ष भगवती पौडेलको विषेश आतिथ्यता रहेको थियो ।
कार्यक्रममा जिल्ला समन्वय समितिका सदस्य कविता परियार, वडा नं ९ का महिला सदस्य छनमाया गुरुङ, भुपु गाविस सचिव वैकुन्ठ प्रसाद लम्साल, सहकारीको जग्गा दाता बोधराज सुवेदी र स्वास्थय चौकी जग्गा दाता दयानाथ दुवाडीको आतिथ्यता रहेको थियो ।

साधारण सभाको अवसरमा सहकारीको असल ऋणी र जेष्ठ सदस्यहरु १४ जना, सहकारीलाई जग्गा प्रदान गर्ने जग्गा दाता बोधराज सुवेदी र स्वाथ्य चौकीको जग्गा दाता दयानाथ दुवाडीलाई दोसल्ला ओडाएर सम्मान गरिएको थियो ।

साधारणसभाको अवसरमा नेपाल निजामती कर्मचारी युनियनका केन्द्रिय सदस्य तथा मुरली भन्ज्याङ स्वास्थ्य चौकीका भुपु स्वास्थ्य चौकी प्रमुख कृष्ण बद्री पौडेलले सहकारीका ११ जना कार्यसमिति सदस्य र २ जना कर्मचारीहरुलाइ झोला उपाहार प्रदान गर्नुभएको छ ।
साविकको मुरली भन्ज्याङ गाविसलाई समेटेर स्थापना गरिएको सहकारी २०७१ सालमा दर्ता भइ संचालनमा आएको हो । ७८ लाख ४६ हजार कुल पुँजी रहेको सहकारीमा १३ वटा आमा समुहका ८०५ जना शेयर सदस्यहरु रहेका छन् ।

अधिकांश सहकारीहरु बचत तथा ऋण, पशुपालन तथा खेतीपाती सम्बन्धि हुने भन्दै यस सहकारी गर्भवती, सुत्केरी, बालबालिका, उमेर ढल्केका महिला, किशोर किशोरीको लागि स्वास्थ्य सम्बन्धि जनचेतना मुलक कार्यक्रम संचालन गरी स्वास्थ्यमा सुधार ल्याउनको लागि स्थापना भएको नेपाल निजामती कर्मचारी युनियनका केन्द्रिय सदस्य तथा मुरली भन्ज्याङ स्वास्थ्य चौकीका भुपु स्वास्थ्य चौकी प्रमुख कृष्ण बद्री पौडेलले जानकारी दिनुभयो ।

सहकारीका आमा समुहले हरेक महिनाको १ देखि १३ गतेसम्म शेयर सदस्यहरुलाई जनचेतना मुलक कार्यक्रम गर्दै आएकोमा कोराना माहामारी पछि रोकिएकोले अब आगामी दिन उक्त कार्यक्रमलाई निरन्तार दिने संस्थाका अध्यक्ष अम्बिका दुवाडीले बताउनुभयो ।