गुठी समस्या समाधानको लागि राजनीति दलहरुले छलछाम गरेको गुठी पीडितको आरोप

धादिङ,१७ पुस
गुठी समस्याको समाधान नभएको भन्दै ज्यामरुङका नागरिकहरु निराश बनेका छन् । निर्वाचन अघि गुठी समस्या तत्काल समाधान गर्छु भनेका राजनैतिक दलका नेताहरुले हाल सम्म काम नगरिदिदा उनीहरु निराश बनेका हुन् ।
गुठी पीडित नागरिकहरुले निर्वाचन अघि नो भोटको अभियाननै सन्चालन गरेका थिए । निर्वाचन अघि दलहरुले गुठी समस्या समाधान गछौँ भनेर साझा प्रतिबद्धता जनाएका थिए । तर निर्वाचित जनप्रतिनिधिहरुले समेत छलछाम गरिरहेकोले धादिङका ३५ सय घरधुरी अहिले निरासमा रहेका स्थानियहरुले आरोप लगाएका छन् ।

नीलकण्ठ नगरपालिका वडा न १०, ११ नेत्रावती डवजोङ गाउँपालिका ५ र आरुघाट गाउँपालिका वडा न ३, ४, ५ का स्थानियहरुले पुस्तौ पुस्ता देखि भोग चलन गर्दै आएको जग्गाहरुमा नापीको बखत तत्कालिन वडा हाकिमको आदेशले तिरो तिर्नका लागी भनेर पुर्जाको एक किनारामा श्री ५ को बायु गुठी लेख्न लगाएको र जग्गा धनीको महलको नाममा श्री ५ बायु गुठी र मोहिको महलमा ब्यक्तिको नाम लेखिएकोले स्थानियहरु समस्यामा परेका हुन् ।पुख्र्याैली जग्गा कतै कसैबाट निगाहा नभएको, नापीको समयमा तिरोमात्र बायु गुठीको तिर्ने गरी रैतानी पुर्जा प्राप्त गरेको, बिगत देखि नै नगदी तिरो मालपोत तिर्दै आएको, उक्त क्षेत्रमा गुठी जग्गा भएको तर आफुहरुको जग्गा संस्थाको लागत नभएको र गुठी संस्था बाट २०७८ साल असोज १७ गते गुठी रैतानी जग्गा हो भनि पत्र दिएकोमा भुमी मन्त्रालय सिस्टमको गल्ती भन्दै पन्छिने काम गरेकोले स्थानियहरु समस्यामा परेका हुन ।

गुठीको जग्गा भएको भए नापीको समयमा गुठी अधिनष्ट भनेर लेखिन्थ्यो तर हाल आएर अधिनस्थ बनाई सरकारले आफुहरुको सम्पती खोसेकोले आन्दोलनमा होमिनुको बिकल्प नरहेको श्री ५ को बायु गुठी समस्या समाधान समिति धादिङ गोरखाका संयोजक ईश्वरी बहादुर लम्सालले बताउनुभयो ।

उर्वर भुमी खेतीयोग्य जमिनमा स्थानियहरुले खेती पाती त गरेका छन्,तर आफ्नो जग्गाहरुको बैङकीङ कारोबार गर्न नपाउँदा स साना ब्यवसाय समेत संचालन गर्न नपाएको स्थानियहरुको भनाई छ ।

उनिहरुले आफ्नो समस्या सरकारले समाधान नगरिदिए आन्दोलनको साथ साथै आत्मदाह गर्न समेत पछि नपर्ने बताएका छन् ।उता निर्वाचित जनप्रतिनिधिहरुले गुठी पिडित स्थानियहरु संग आफुहरु संगसगै रहेको भन्दै समाधानका निमित्त पहल गरिरहेको बताउदै आएका छन्।