मेयर ढुंगानाद्वारा नीलकण्ठ महादेव र दुर्गा भगवती मन्दिर उद्घाटन, अब सर्बसाधारणले पनि पुजा गर्न पाउने

धादिङ,९ पुष
जिल्ला प्रहरी कार्यालयको परिसमा रहेको नीलकण्ठ महादेव र दुर्गा भगवतीको मन्दिरको नीलकण्ठ नगर प्रमुख भीम प्रसाद ढुंगानाले उद्घाटन गर्नुभएको छ ।नीलकण्ठ नगरपालिकाको आर्थिक सहयोगमा निर्माण सम्पन्न भएको मन्दिरको आईतबार एक कार्यक्रमका बीच ढुंगानाले उद्घाटन गर्नुभएको हो । ऐतिहासिक महत्व बोकेको निलकण्ठ महादेवको मन्दिरबाट नीलकण्ठ नगरपालिकाको नामाकरण भएको छ ।

मन्दिर उद्घाटन समारोहलाई सम्बोधन गर्नुहुदै नगर प्रमुख भीम प्रसाद ढुंगानाले ऐतिहासिक धार्मिक मठ मन्दिरहरुको संरक्षण गर्नुपर्ने दायित्व स्थानीय सरकारको रहेको बताउनुभयो । हरेक सुचकमा नीलकण्ठ नगरपालिका उत्कृष्ट रहेको भन्दै आफ्नो क्षमताले भ्याएसम्मको काम गर्न सकेको बताउनुभयो । नगरपालिकाले विकास निर्माणका कामसँगै अन्य क्षेत्रलाई पनि अंगालेर काम गरिरहेको उहाँले बताउनुभयो । ‘धार्मिक तथा ऐतिहासिक महत्व बोकेका क्षेत्रको संरक्षणको काम नीलकण्ठ नगरपालिकाले गरिरहेको बताउनुभयो ।

नीलकण्ठेश्वर महादेवको पार्कसहित ठूलै संरचना बनाउने कामको शुरु भएको मेयर ढुंगानाले बताउनुभयो । नीलकण्ठ नगरपालिकाको आर्थिक सहयोगमा करिव ८ लाखमा नीलकण्ठ महादेवको मन्दिर निर्माण गरिएको जिल्ला प्रहरी कार्यालय धादिङका प्रमुख प्रहरी उपरीक्षक गौतम मिश्रले बताउनुभयो ।आन्तरिक श्रोत, प्रहरीको श्रमदान तथा सहयोगी दाताहरुको मेट्रिएलबाट दुर्गा भगवती मन्दिर, पार्क, हिरासतमा पुस्तकालय, कार्यालय परिसरमा ढलान तथा पिचसँगै रङरोगन लगायतको काम पनि भएको एसपी मिश्रले बताउनुभएको छ ।

प्रहरी प्रमुख गौतम मिश्रको अध्यक्षतामा सम्पन्न भएको कार्यक्रममा नगर प्रमुख भीम प्रसाद ढुंगानाको प्रमुख आतिथ्यता रहेको थियो । कार्यक्रममा प्रमुख जिल्ला अधिकारी बद्रीनाथ गैह्रे,नीलकण्ठ नगरपालिकाका प्रमुख प्रशासकीय अधिकृत पुरुषोत्तम सुवेदीको विशेष आतिथ्यता रहेको थियो । कार्यक्रममा वडा अध्यक्षहरु,नागरिक समाज तथा सरोकारावाला निकायका प्रमुख एवंम प्रतिनिधिहरुको उपस्थिती रहेको थियो ।