प्रमुख प्रशासकीय अधिकृत हुदाहुदै अर्का अधिकृत ल्याएको भन्दै उपाध्यक्षको नेतृत्वमा गल्छी गाउँपालिकामा ताला

धादिङ,१५ मंसिर
गल्छी गाउँपालिकाका उपाध्यक्ष भाईकाजी तिवारीको नेतृत्व र अन्य जनप्रतिनिधिहरुको सहभागितामा गल्छी गाउँपालिकामा ताला बन्दी गरीएको छ । मंसिर ६ गते हाजिर भएका प्रमुख प्रशासकीय अधिकृत नेत्रमणी न्यौपाने हुँदाहुदै पनि मन्त्रालयले अर्को प्रमुख प्रशासकीय अधिकृत पठाएको भन्दै तालाबन्दी गरीएको हो ।

सामान्य प्रशासन मन्त्रालयले कर्मचारी पठाएको दुई हप्ता नबिप्दै अर्को प्रमुख प्रशासकीय अधिकृत पठाएको भन्दै गल्छी गाउँपालिकामा विवाद भएको हो । नयाँ प्रमुख प्रशासकीय अधिकृत नर बहादुर विक आज हाजिर गर्न भन्दै गल्छी गाउँपालिकामा आउनु भएको थियो । प्रमुख प्रशासकीय अधिकृत हुँदाहुदै अर्को प्रमुख प्रशासकीयलाई हाजिर गर्न नदिने भन्दै तालाबन्दी गरीएको हो ।

गाउँपालिका अध्यक्ष समक्ष असन्तुष्ट पक्षहरुले छोटो समयमै के कारणले नयाँ प्रशासकीय प्रमुख गाउँपालिकामा ल्याईयो भन्ने विषयमा कारण माग्दै ताला लगाईएको गाउँपालिका उपाध्यक्ष भाईकाजी तिवारीले जानकारी दिनुभयो । कर्मचारी हुँदा हुदै किन अर्को कर्मचारी ल्याउन लागेको भन्ने प्रश्नमा गाउँपालिकाका अध्यक्ष  केदारनाथ खतिवडाले आफुले मात्र चाहेर ल्याउन नसकिने भन्दै मन्त्रालयलेनै पठाएको बताउनुभयो ।