कांग्रेस धादिङले डा.कार्कीको सम्झनामा श्रद्धाञ्जली सभा कार्यक्रम गर्ने

धादिङ,१५ भाद्र ।
नेपाली कांग्रेस धादिङले बागमती प्रदेश सभाका पूर्वसदस्य तथा नेपाली कांग्रेस धादिङका पूर्वसचिव स्व.डा.राजाराम कार्कीको भदौं १९ गते श्रद्धाञ्जली सभा कार्यक्रम गर्ने भएको छ ।

बागमती प्रदेशसभाका पूर्वसदस्य तथा नेपाली कांग्रेस धादिङका पूर्वसचिव डा. स्व कार्कीको निधनको १४ औं दिनको अवसर पारेर श्रद्धाञ्जली सभामा आयोजना गरिएको पार्टि सचिव विकास श्रेष्ठले जानकारी दिनु भएको छ ।

स्व. डा. कार्कीको स्मृति र सम्मानमा भदौ १९ गते मंगलबार १ बजे बीपी स्मृति भवन, धादिङबेसीमा श्रद्धाञ्जली सभा गर्ने श्रेष्ठले बताउनुभयो ।नेपाली कांग्रेस पार्टीसँग आस्था राख्नुहुनेहरुलाई श्रद्धाञ्जली सभामा उपस्थितिका लागि कांग्रेस धादिङले अनुरोध गरेको छ ।

भदौ ६ गते (बुधबार) साँझ वीर अस्पतालमा उपचारका क्रममा उनको निधन भएको हो ।

डा. राजाराम कार्कीको राजनीतिक यात्रा
उहाँले नेपाली कांग्रेसको केन्द्रीय सदस्य(२०५९), नेपाली कांग्रेसको नवौं महाधिवेशनदेखि हालसम्म लगातार महासमिति सदस्य/महाधिवेशन प्रतिनिधि, नेपाल तरुण दलको केन्द्रीय महासचिव(२०५५); नेपाली कांग्रेस, जिल्ला कार्यसमिति, धादिङको सचिव(२०५३); स्वतन्त्र विद्यार्थी युनियन, चिकित्साशास्त्र अध्ययन संस्थान, महाराजगञ्ज क्याम्पसको सभापति (२०४३) लगायतको जिम्मेवारी वहन गर्नुभएको थियो । उहाँ वि.सं. २०७४ मा सम्पन्न प्रदेशसभाको निर्वाचनमा बागमती प्रदेशसभामा समानुपातिक निर्वाचन प्रणालीबाट सदस्यमा निर्वाचित हुनुभएको थियोे । वि. सं. २०६४ मा सम्पन्न संविधानसभाको निर्वाचनमा धादिङ जिल्लाको तत्कालीन क्षेत्र नं. ३ मा उहाँ नेपाली कांग्रेसको उम्मेदवार हुनुहुन्थ्यो । उहाँका पिता, माता, २ श्रीमती, ४ छोरा र १ छोरी हुनुहुन्छ ।