समुदायस्तरमै सङ्क्रमण पुगेको अनुमान

नेपालमा कोरोना सङ्क्रमण समुदायस्तरमै पुगिसकेको अनुमान गरिएको छ । पछिल्लो समय भारतमा भारतमा कोरोनाका बिरामी बढेसँगे नेपालमा पनि त्यसको असर देखिएको छ । खुला सिमानाका कारण भारतमा कोरोना बढ्दा नेपालमा पनि सङ्क्रमण दर बढ्ने गरेको छ ।

हिजो मात्रै नेपालभर ९९ जनामा कोरोना भाईरसको सङ्क्रमण देखिएको थियो । विज्ञहरूले भने सङ्क्रमण यो तथ्याङ्कभन्दा अझ बढी हुनसक्ने अनुमान गरेका छन् । शङ्का लागेर जँचाउन पुगेका र अस्पतालमा भर्ना भएकाहरूको तथ्याङ्क मात्रै सरकारले प्रस्तुत गर्ने भएकाले वास्तविकता अझ बढी हुन सक्ने उनिहरूको अनुमान छ ।

सङ्क्रामक रोग विशेषज्ञ डा. शेरवहादुर पुनले सङ्क्रमण समुदायस्तरमै पुगेकाले सचेत रहन आग्रह गर्नुभयो । यो समयमा हुने मौसमी रुघाखोकी र कोरोना भाईरसको लक्षण मिल्दोजुल्दो भएकाले लक्षण देखिनासाथ छुट्टै बस्न र जाँच गराउन उहाँले आग्रह गर्नुभयो । रुघाखोकी लाग्ने, घाँटी खसखस हुने, स्वाद नआउने, ज्वरो आउने जस्ता लक्षण देखिए तुरुन्तै जाँच गराउन उहाँले भन्नुभयो ।

कोरोनाको दुई मात्रा खोप लगाएका व्यक्ती सङ्क्रमित भएपनि अस्पताल पुग्नुपर्ने सम्भावना कम देखिएकाले कम्तिमा दुई मात्रा खोप लगाउन उहाँले सुझाव दिनुभयो ।