नयाँको औचित्य पुष्टि होला ?

धादिङ,०९ असोज।
मंसिर ४ गते हुने संघ र प्रदेशको निर्वाचनमा धेरै राजनीतिक दलहरुले आ आफुले राजनीतिक उचाइ चुम्ने अपेक्षा गरिरहेको बेला फिल्ड स्तरमा भने त्यस्तो हुनसक्नु अड्कलबाजी गर्न थालिएको छ ।

राजनीतिक दलप्रतिको निराशाका कारण यतिवेला गाउँ टोल सम्मका युवाहरु आगामी निर्वाचनमा पख् भन्ने खालको अभिव्यक्ति दिँदै हिडिरहेका छन् । यसअघिको निर्वाचनमा सबैभन्दा ठूलो दल नेकपा भित्रको एमाले, माओवादी, नेपाली काँग्रेस लगायतका दलहरुको मत संख्या सुरक्षित गर्न निकै अफ्ठ्यारो पर्ने देखिन्छ किनभने राजनीतिक दलहरुको नेतृत्व गरे जो जो नेतृत्वमा पुगेका छन् उनीहरुले देशको कायापलट गर्नेगरी खासै धेरै परिवर्तन देखाउन सकेका छैनन् ।

संघ, प्रदेश र स्थानीय तीन तहको नेतृत्व गरिरहेकाहरु निरन्तर विकासका कामहरुमा दिनरात भनेर हिडिरहेका छन् तर प्रभावकारी रिजल्ट आइरहेको छैन । सिमित स्थानीय तहका नेतृत्वबाट केही सकारात्मक कामका अभ्यासहरु भैरहेको भए पनि धेरैजसो जनप्रतिनिधिहरुले नागरिकको अपेक्षा अनुसारको काम गर्न सकेका छैनन् ।

हुनतः निर्वाचनको समयमा राजनीतिक पार्टीको तर्फबाट निर्वाचनका लागि जस्ता जस्तालाई टिकट दिए पनि पछि पछि लाग्ने बानी हामीहरुको छ । राजनीतिक चेतना, काममा सृजनशिलता तथा व्यवहारमा प्रतिवद्धतादेखि आर्थिक पारदर्शिता कुन उम्मेदवारको रोजाई वा प्राथमिकतामा छ भन्ने कुरालाई हामीले मुल्याँकन गर्ने गरेका छैनौं जसका कारण लहडको भरमा कतिपय उम्मेदवारहरुले सजिलै विजय प्राप्त गरिरहेका छन्। त्यसकारण पनि जनताले आफ्नो दैनिक जिवनमा प्राप्त गर्नुपर्ने उपलव्धीहरु सरकारको तर्फबाट पाउन सकेका छैनन् ।

अहिले जतिपनि युवाहरु हाम्रोमा केही भएन भनेर कराइरहेका छन् त्यो कसका कारण नभएको ? हुनुपर्ने के के थियो ? त्यो कसरी बनाउन सकिन्छ ? सहभागिता कस कसको चाहिन्छ ? यि र यस्ता कुरामा भने युवाहरुले बहस गरिरहेका छैनन, बस हामीकहाँ केही भएन जस्ता कुरालाई मात्र प्राथमिकता दिएर मात्रै हुँदैन, त्यो खालको मानसिकता भएका प्रतिनिधि को हुन सक्छन् ? त्यसको पूर्व मूल्याँकन गर्न जरुरी हुन्थ्यो ।

अवको संघ र प्रदेश सरकारको निर्वाचनमा साँघुरो सोंच राख्ने र अहिलेसम्मको अवस्थामा कस कसले विकास र नागरिकको जिवनमा अनुभूत गर्नेगरी नीतिगत काममा भूमीका खेले उनीहरुलाई मात्रै जिताउने प्रतिवद्धता जनाउनु जरुरी हुन्छ । अहिले नयाँ नयाँ काम गर्ने पुराना राजनीतिक दलहरुलाई हराउने नयाँ अनुहारको खोजी गर्ने अभियानमा लागेका युवाहरु निर्वाचनको बेला एउटा एउटा पार्टीको पछि लाग्न थाले भने हाम्रो हालत के होला ? केही उदाहरणहरु देखिसकेका छन् ।

लामो समयसम्म अरुलाई गाली गर्ने र महत्वपूर्ण भूमीकामा रहनुपर्ने दिन पार्टी नै प्रवेश गर्ने वा केही सिमित स्वार्थ लिएर एउटालाई सहयोग गर्ने जस्तो कुरा आफैंलाई आत्मघाती निर्णय बन्न सक्छ यसर्थ निर्वाचन नजिकिदै गैरहेको यो अवस्थामा राजनीतिक चेतनालाई आत्मसाथ गर्दै नयाँ खालको राजनीतिक तथा सामाजिक परिवर्तन रोज्नेगरि अभियानमा जुट्दा मात्रै सबैको हित हुन्छ । अन्यथा पुराना र नयाँ भन्नेहरुको विचमा केही फरक देखिदैन, नयाँमा लाग्नुको औचित्य पनि पुष्टि हुँदैन ।