धादिङमा क्रिस्चियन धर्मावलम्बीले विभिन्न कार्यक्रम गरी ‘इष्टर सन्डे’ मनाए

आइतबार धादिङमा क्रिस्चियन धर्मावलम्बीले विभिन्न कार्यक्रम गरी ‘इष्टर सन्डे’ मनाएका छन्। इष्टर सन्डे क्रिस्चियनको दोस्रो ठूलो चाड हो । चर्चमा प्रार्थनासँगै विभिन्न कार्यक्रम गरेर उनीहरुले यो पर्व मनाएका हुन् । प्रभु येशु ख्रीष्टको पुनरुत्थानको सम्झना गर्दै इसाईहरुको इष्टर सन्डे महोत्सवको अवसरमा धादिङमा प्रभु यशु ख्रिष्टको पुनरुत्थान (इष्टर सण्डे) घोषणा महोत्सव कार्यक्रम २०७६ सम्पन्न भएको छ । आईतबार धादिङको बेनिघाट रोराङ गाँउपालिका ३ मलेखुमा (इष्टर सण्डे) घोषणा महोत्सव कार्यक्रम २०७६ सम्पन्न भएको हो ।

येशू ख्रीष्टमा विश्वास गर्नेहरूले येशू ख्रीष्ट मृत्युबाट पुनरुत्थान हुनुभएको घटनालाई संसारभरि सबै मानिसहरूलाई सुनाउने काम गर्दछन्। येशूमा विश्वास गर्नेहरूले उद्धार, मुक्ति र अनन्त जीवन पाउने कुरा विश्वमा रहेका विभिन्न भाषा, जाति क्षेत्रका चर्चहरूले प्रचारप्रसार गर्दै आएका छन् । जसरी ख्रीष्ट येशू पुनरुत्थान हुनुभयो र जीवितै स्वर्ग उचालिनुभयो, त्यसैगरी येशू ख्रीष्ट फेरि यस संसारमा आउँदै हुनुहुन्छ भनि बाइबलले सन्देश दिन्छ ।

कार्यक्रममा बोल्दै प्रतिनिधि सभा सदस्य भुमि त्रिपाठीले विगतका समयमा इसाई धर्ममा लागे वापत् जेल जानुपर्ने अवस्था थियो, त्यो पछिल्लो समयमा आएर अन्त्य भई सबै धर्म समान भएको बताउनुभयो । कार्यक्रमको प्रमुख अतिथि समेत त्रिपाठीले धर्ममा कुनै पनि भेदभाव, दमन, उत्पीडन, अत्याचार भयो भने न्यायको पक्षमा जहिले पनि आफु हाजिर हुने बताउनु भयो । उहाँले मुलुक धर्म निरपेक्षता हुनुपर्छ भन्ने धारणा राखेर कम्युनिष्ट स्थापना भएको बताउनुभयो । अब नेपालमा निरकुङश राजतन्त्रले गरे जस्तै एउटै धर्म नहुने बिश्वास व्यक्त गर्नुभयो । उहाँले आफुलाई पचास हजार मत कुनै एउटा धर्म माने मान्छेले मात्र नदिएको भन्दै सबै धर्मका जनताले मत दिएर जनप्रतिनिधि बनाइएको बताउनुभयो । जिल्ला ईसाइ समाज धादिङका अध्यक्ष लेखपाल तामाङले प्रिभु येशु ख्रीष्ट मृत्युबाट तेस्रो दिनमा आइतवार जिवित भइ उठेको घोषणा गर्दै मानिसहरुले मुक्ति, शान्ति र छुटकाराको लागि येशू ख्रीष्टलाई चिन्नुपर्ने बताउनुभयो।

पास्टर केशव थापाको सभापतित्वमा भएको घोषणा महोत्सव कार्यक्रममा धादिङ क्षेत्र नं १ का प्रतिनिधि सभा सदस्य भुमि त्रिपाठीको प्रमुख आतिथ्य रहेको थियो । नेपालि कांग्रेस धादिङका जिल्ला सभापति रमेश धमलाको बिशेष आतिथ्य रहेको कार्यक्रममा बेनिघाट रोराङ गाउँपालिकाका अध्यक्ष पित बहादुर डल्लाकोटि, उपाध्यक्ष देबि प्रसाद सिलवाल, बेनिघाट रोराङ गाउँपालिका वडा नं ३ का वडाध्यक्ष भुवन त्रिपाठी, धादिङ जिल्लामा रहेको ३०० भन्दा बढि चर्चका पास्टरहरुको आतिथ्य रहेको थियो । कार्यक्रममा प्रभु यशु ख्रिस्टको सम्झनामा क्रिस्चियन गीत तथा नृत्यहरु प्रस्तुत गरेका थिए । महोत्सवमा धादिङका सयौं मण्डलीहरूबाट २ हजार भन्दा बढी इसाईहरू भेला भएका थिए ।