दुई सातामै कृष्णभीरमा नयाँ ट्र्याक,पृथ्वी राजमार्ग सञ्चालनमा

धादिङ,३१ भदौ
मलेखु–मुग्लिङ सडकखण्ड अन्तर्गत धादिङको कृष्णभीरमा नयाँ ट्र्याक निर्माणसँगै पृथ्वी राजमार्ग घोषित समयमै सञ्चालनमा आएको छ । भदौ १० गतेको बाढीले जोखिममा पारेको कृष्णभीरमा भदौ १४ गतेको बाढीले सडकसमेत बगाएपछि अवरुद्ध राजमार्ग असोज १ गते बिहानदेखि दुईतर्फी यातायात सञ्चालनका लागि तयार भएको हो ।

संघीय राजधानी प्रवेशको मुख्य मार्ग अवरुद्ध हुँदा ग्यास, तेल तथा अन्य अत्यावश्यक वस्तुको आपूर्ति र आवागमन प्रभावित हुँदै आएको थियो । वैकल्पिक मार्ग प्रयोगमा आए पनि सहज नभएपछि प्रधानमन्त्री वालेन्द्र शाहले सडक छिटो सञ्चालनमा ल्याउन पूर्वाधार विकास मन्त्रालयलाई निर्देशन दिनुभएको थियो । भदौ १७ गतेको प्रतिनिधिसभा बैठकमा प्रधानमन्त्री शाहले कृष्णभीरको सडक भदौ महिनाभित्रै सञ्चालनमा ल्याउने जानकारी दिनुभएको थियो ।

प्रधानमन्त्रीको चासो तथा सडक सञ्चालनका लागि दैनिक १६ घण्टासम्म कार्यक्षेत्रमा खटिएका प्राविधिक र कामदारको प्रयासबाट काम सुरु भएको दुई सातामै राजमार्ग सञ्चालनमा ल्याइएको हो । बाढीसँगैको पहिरोले सडक बगाएपछि पूर्वाधार विकास मन्त्रालय र सडक विभागले नेपाल जियोटेक्निकल सोसाइटीका प्राविधिकको सहयोगमा चार दिनसम्म द्रुत अध्ययन गरेका थिए ।

अध्ययनपछि कृष्णभीरको पहाड काटेर करिब २५० मिटर लामो नयाँ ट्र्याक निर्माण गर्ने विकल्प अघि सारिएको थियो । सोहीअनुसार भदौ १९ गतेदेखि रुख कटान गरी ३५ मिटर अग्लो र २० मिटरसम्म भित्र पहाड काटेर ट्र्याक निर्माण गरिएको हो । प्राविधिकसहित ५० जनाले दैनिक १२ देखि १६ घण्टासम्म काम गरेका थिए ।

काम सुरु भएको दशौँ दिन, भदौ २८ गतेदेखि ग्यास बुलेटसहित केही सवारीसाधनलाई परीक्षणका रूपमा नयाँ ट्र्याकबाट आवतजावत गराइएको थियो । त्यसपछि बिहान र बेलुका अत्यावश्यक सवारीसाधन सञ्चालन गरिँदै आएको कृष्णभीरमा सडक ग्राभेल, नाली निर्माण तथा सडकलाई थप मजबुत बनाउने काम सम्पन्न गरी असोज १ गते बिहानदेखि दुईतर्फी यातायात सञ्चालनको प्रबन्ध गरिएको हो ।

आपूर्ति र व्यापारमा परेको असर

कृष्णभीरको पहिरोले सडक बगाएपछि पृथ्वी राजमार्ग अवरुद्ध हुँदा पूर्वदेखि सुदूरपश्चिमसम्मका सार्वजनिक सवारीसाधनसमेत हेटौँडा हुँदै त्रिभुवन राजपथबाट काठमाडौँ आउनुपर्ने बाध्यता थियो । ग्यास बुलेट, तेल ट्याङ्करलगायत ठूला सवारीसाधन सञ्चालनमा समस्या हुँदा संघीय राजधानीको आपूर्ति प्रणाली प्रभावित हुने अवस्था सिर्जना भएको थियो । राजमार्ग अवरुद्ध हुँदा राजमार्ग क्षेत्रको व्यापार व्यवसायसमेत प्रभावित भएको थियो ।

दुई दशकपछि फेरि नयाँ ट्र्याक

२०५५ सालदेखि पहिरो जान सुरु गरेको कृष्णभीरमा २०५७ सालको साउनमा ठूलो पहिरो गएको थियो । त्यसपछि पनि पटकपटक पहिरोको समस्या भोग्दै आएको कृष्णभीरमा जैविक तथा जियो–टेक इन्जिनियरिङ प्रविधिबाट पहिरो नियन्त्रणका काम गरिएका थिए ।

२०६० सालमा पहिरो नियन्त्रणका लागि निर्माण गरिएको संरचनाको आयु २० वर्ष तोकिएको थियो । तत्कालीन संरचना निर्माण भएको करिब २३ वर्षपछि भदौ १४ गतेको बाढीले कृष्णभीरको सडक पूरै बगाएपछि नयाँ ट्र्याक निर्माण गरी पृथ्वी राजमार्ग सञ्चालनमा ल्याउनुपरेको हो ।

काठमाडौँ उपत्यका र आसपासका क्षेत्रबाहेक देशका करिब ६७ जिल्लाका लागि पृथ्वी राजमार्ग संघीय राजधानी प्रवेश गर्ने मुख्य मार्गका रूपमा रहेको छ । राजमार्ग सञ्चालनमा आएसँगै यात्रु आवागमन, मालवाहक सवारीसाधन सञ्चालन तथा अत्यावश्यक वस्तुको आपूर्तिमा सहजता आउने अपेक्षा गरिएको छ ।