नेपाली समाज भारतद्वारा बाढीपीडित राहत कोषमा २१ लाख २१ हजार सहयोग

धादिङ,३१ भदौ
नेपाली समाज भारत, केन्द्रीय समितिले बाढीपहिरो प्रभावित नागरिकको उद्धार, राहत तथा पुनस्र्थापनाका लागि २१ लाख २१ हजार रुपैयाँ आर्थिक सहयोग गरेको छ।समाजले बुधबार जारी गरेको प्रेस विज्ञप्तिअनुसार उक्त रकम नेपाली राजदूतावास, नयाँ दिल्लीका कार्यवाहक राजदूत डा. सुरेन्द्र थापामार्फत बाढी प्रभावित नागरिकको राहत तथा पुनस्र्थापनाका लागि हस्तान्तरण गरिएको हो।नेपाली समाज भारतका केन्द्रीय सह–संयोजक आर. बी. खड्काको नेतृत्वमा रहेको नेता–कार्यकर्ताको सामूहिक टोलीले सहयोग रकम हस्तान्तरण गरेको जनाइएको छ।

टोलीमा सह–संयोजक वेदप्रकाश भण्डारी, वरिष्ठ सदस्य मानु श्रेष्ठ, नारायण बिक, दीपक जीसी, माइकल क्षेत्री, नारायण बिस्ट, लक्ष्मण सोनी तथा समाजसेवी लक्ष्मी रावतलगायत सहभागी थिए। भाद्र १० गते रसुवा, नुवाकोट, धादिङ लगायत विभिन्न क्षेत्रमा आएको बाढीपहिरोबाट भएको जनधनको क्षतिप्रति दुःख व्यक्त गर्दै समाजले मृतकप्रति श्रद्धाञ्जली, शोकाकुल परिवारजनमा समवेदना तथा घाइतेको शीघ्र स्वास्थ्यलाभको कामना गरेको छ।विज्ञप्तिमार्फत समाजले बाढीपहिरोमा हराइरहेका नागरिकको खोजी, प्रभावितको उद्धार, राहत तथा पुनस्र्थापनाका लागि नेपाल सरकार र सम्बन्धित निकायलाई थप प्रभावकारी भूमिका निर्वाह गर्न आग्रह गरेको छ।

यसअघि मानवीय अभियानको प्रारम्भिक चरणमा तमिलनाडु–पुडुचेरी संयुक्त राज्य समितिबाट ५० हजार रुपैयाँ तथा पञ्जाब–जम्मु कश्मीर, महाराष्ट्र, दिल्ली एनसीआर, कर्नाटक, मध्यप्रदेश, उत्तर प्रदेश, हिमाचल प्रदेश, गोवा, गुजरातलगायत विभिन्न राज्य समितिको पहलमा दुई लाख रुपैयाँ प्रधानमन्त्री राहत कोषमा सहयोग पठाइसकेको केन्द्रीय कोषाध्यक्ष मान बहादुर श्रेष्ठले जानकारी दिनुभयो । समाजले विपत्तिको समयमा आर्थिक तथा नैतिक सहयोग गर्ने भारतभरिका नेपाली समाजका राज्य तथा नगर समिति, नेता–कार्यकर्ता, सदस्य, नेपाली तथा भारतीय समुदाय र शुभेच्छुकप्रति आभार व्यक्त गरेको छ। साथै, देश–विदेशमा रहेका नेपालीलाई आफ्नो क्षमता र सामथ्र्यअनुसार बाढीपीडितको उद्धार, राहत तथा पुनस्र्थापनामा सहयोग गर्न अपिल गरेको छ।