अन्तराष्ट्रिय धादिङ समाजको आयोजनामा बैरेनी अस्पतालमा दुई दिने नि:शुल्क विशेषज्ञ स्वास्थ्य शिविर सम्पन्न,२३५ जना लभान्वित

धादिङ,२९ भदौ
भोटेकोसीमा हिमपहिरोपछि आएको बाढीबाट क्षतिग्रस्त बनेको गल्छी गाउँपालिका–६ बैरेनीस्थित बैरेनी अस्पतालमा सञ्चालन गरिएको दुईदिने निःशुल्क विशेषज्ञ स्वास्थ्य शिविरबाट २३५ जनाले स्वास्थ्य सेवा लिएका छन् ।अन्तर्राष्ट्रिय धादिङ समाजको आयोजनामा तथा ब्लड डोनर्स अफ अमेरिका, धादिङ समाज यूके र धादिङ सेवा समाज कतारको सहकार्यमा शिविर सञ्चालन गरिएको हो । शिविरमा गल्छी गाउँपालिकाको स्थानीय सहयोग रहेको थियो भने इन्सेकले कार्यक्रम समन्वय गरेको थियो ।शिविरमा जनरल फिजिसियन, स्त्रीरोग, हाडजोर्नी तथा मानसिक रोगसम्बन्धी विशेषज्ञ चिकित्सकबाट स्वास्थ्य परीक्षण, उपचार तथा परामर्श सेवा प्रदान गरिएको थियो । अन्तर्राष्ट्रिय धादिङ समाजका सल्लाहकार डा. प्रताप छत्कुलीका अनुसार जनरल फिजिसियनतर्फ ८०, स्त्रीरोगतर्फ ५१, हाडजोर्नीतर्फ ८२ र मानसिक रोगतर्फ २२ जनाले सेवा लिएका छन् ।शिविरमा जनरल फिजिसियन डा. दीपक सुन्दर श्रेष्ठ, स्त्रीरोग विशेषज्ञ डा. सरिता सटौल, मानसिक रोग विशेषज्ञ डा. प्रज्वल थापा र हाडजोर्नी विशेषज्ञ डा. विकास पराजुलीले स्वास्थ्य परीक्षण तथा परामर्श सेवा दिनुभएको थियो ।

बाढीबाट अस्पतालको भौतिक संरचना, औषधि तथा स्वास्थ्य उपकरणमा क्षति पुगेपछि केही समय स्वास्थ्य सेवा प्रभावित बनेको थियो । सरसफाइ तथा आवश्यक व्यवस्थापनपछि अस्पतालबाट सेवा पुनः सुरु गरिएसँगै विशेषज्ञ चिकित्सकबाट स्वास्थ्य परीक्षण र परामर्श उपलब्ध गराउने उद्देश्यले शिविर सञ्चालन गरिएको आयोजकले जनाएको छ ।शिविर समापनका अवसरमा कार्यक्रम सफल बनाउन सहयोग गर्ने चिकित्सक, सहयोगी संस्था तथा स्थानीय सरकारलाई प्रशंसापत्र प्रदान गरिएको थियो । कार्यक्रममा अन्तर्राष्ट्रिय धादिङ समाजका सल्लाहकार नर्स प्रसुना कँडेललगायतले आगामी दिनमा पनि अस्पतालको सेवा विस्तार तथा प्रगतिका लागि आवश्यक सहयोग र सहकार्य गर्ने प्रतिबद्धता व्यक्त गर्नुभयो ।

कार्यक्रममा बोल्दै बैरेनी अस्पतालका मेडिकल सुपरिटेन्डेन्ट डा. मधुकर दाहालले विपद्का कारण अस्पताल बन्द भएपछि सकेसम्म छिटो सेवा सञ्चालन गर्नु आवश्यक रहेको बताउनुभयो । विपद्पछि स्वास्थ्य सेवा अवरुद्ध हुँदा महामारी फैलिन सक्ने जोखिम रहने भएकाले नागरिकको जिउज्यानको सुरक्षा र स्वास्थ्य सेवा निरन्तरता दिन अस्पताल तत्काल सञ्चालन गर्नुपरेको उहाँको भनाइ थियो ।बाढीबाट क्षतिग्रस्त अस्पताल पुनः सञ्चालनमा आएलगत्तै आयोजना गरिएको निःशुल्क विशेषज्ञ स्वास्थ्य शिविर अस्पतालका लागि ‘प्राणवायु’ जस्तै भएको डा. दाहालले बताउनुभयो । स्थानीय नागरिकले एकै ठाउँमा विभिन्न विषयका विशेषज्ञ चिकित्सकबाट स्वास्थ्य परीक्षण तथा परामर्श पाउनु महत्वपूर्ण अवसर भएको उहाँले उल्लेख गर्नुभयो ।

अन्तर्राष्ट्रिय धादिङ समाजका अध्यक्ष राजन खकुरालले पठाउनुभएको सन्देशमा बैरेनी अस्पतालको सेवा प्रवाहलाई प्रभावकारी बनाउन आगामी दिनमा पनि समाजले आवश्यक सहकार्य र सहयोग गर्ने प्रतिबद्धता जनाइएको थियो ।बाढीबाट प्रभावित क्षेत्रमा विशेषज्ञ स्वास्थ्य सेवा उपलब्ध गराउने उद्देश्यले आयोजना गरिएको शिविरबाट स्थानीय नागरिक लाभान्वित भएका छन् । अस्पतालको नियमित सेवा पुनः सञ्चालनसँगै विशेषज्ञ स्वास्थ्य शिविर सञ्चालन हुँदा विपद्बाट प्रभावित स्थानीयवासीलाई स्वास्थ्य उपचारमा थप सहजता भएको आयोजकले जनाएको छ ।