‘स्वास्थ्य क्षेत्र पहिलो प्राथमिकता’

धादिङ, चैत्र ४ गते ।
प्रतिनिधि सभा सदस्य निर्वाचनअन्तर्गत धादिङ निर्वाचन क्षेत्र नम्बर २ बाट राष्ट्रिय स्वतन्त्र पार्टी (रास्वपा) का उम्मेदवार बोध नारायण श्रेष्ठ निर्वाचित हुनुभएको छ । ज्वालामुखी गाउँपालिका–७ मैदी निवासी ५६ वर्षीय श्रेष्ठ विकास, सुशासन र जिम्मेवार राजनीतिलाई केन्द्रमा राखेर काम गर्ने प्रतिबद्धतासहित संसद्मा प्रवेश गर्नुभएको हो ।

वि.सं. २०२६ भाद्र ३ गते जन्मिएका श्रेष्ठले राष्ट्रिय तथा प्रदेशस्तरमा दीर्घ अनुभव हासिल गर्नुभएको छ । विकासलाई नीति, प्रणाली र नागरिकको सक्रिय सहभागितासँग जोडेर अघि बढाउनुपर्ने स्पष्ट दृष्टिकोणसहित उहाँ सार्वजनिक जीवनमा सक्रिय रहँदै आउनुभएको छ ।

श्रेष्ठले आफ्नो पहिलो प्राथमिकता स्वास्थ्य क्षेत्र सुधारलाई बनाउने बताउनुभएको छ । “धादिङमा सबै नागरिकले सर्वसुलभ स्वास्थ्य सेवा पाउनुपर्छ भन्ने हाम्रो पहिलो लक्ष्य हो,” उहाँले भन्नुभयो । उहाँका अनुसार सुरुवातमा गैर–बजेटीय कार्यक्रममा केन्द्रित हुनेछ । उक्त कार्यक्रम अन्तरगत धादिङ अस्पतालको सेवास्तर उन्नति गर्ने योजना अघि सारिएको छ ।

यससँगै रोजगार र स्वरोजगार प्रवद्र्धनका लागि ‘नव अनुसन्धान तथा नवप्रवर्तन केन्द्र’ स्थापना गर्ने योजना रहेको उहाँले बताउनुभयो । उक्त केन्द्र युवाहरूको नेतृत्वमा सञ्चालन हुने र नयाँ सोच तथा प्रविधिमार्फत उद्यमशीलता विकासमा योगदान पु¥याउने अपेक्षा गरिएको छ।
त्यसैगरी धादिङमा स्वास्थ्य बीमा कार्यक्रमको पहुँच विस्तार गर्ने र हाल सञ्चालनमा रहेका स्वास्थ्य सेवाहरूलाई व्यवस्थित बनाउने पनि उहाँको प्राथमिकतामा परेको छ ।

श्रेष्ठले आफ्नो मुख्य एजेन्डालाई “३ प्लस २” अवधारणामा अघि बढाइने बताउनुभएको छ । यसअन्तर्गत स्वास्थ्य, रोजगार तथा अनुसन्धान–नवप्रवर्तन केन्द्र स्थापना र स्वास्थ्य बीमा विस्तारलाई तीन प्रमुख एजेन्डा बनाइएको छ । थप दुई एजेन्डाका रूपमा भ्रष्टाचार नियन्त्रणका लागि नागरिक सहभागितामा ‘एन्टि–करप्सन आन्दोलन’ सञ्चालन गर्ने तथा राज्यका सेवा–सुविधा नागरिकसम्म सहज रूपमा पुग्ने गरी प्रणाली सुधार गर्ने योजना उहाँले प्रस्तुत गर्नुभएको छ ।

विकासको सम्भावनाबारे बोल्दै श्रेष्ठले धादिङको भूगोल जटिल भए पनि विभिन्न क्षेत्रमा पर्याप्त सम्भावना रहेको उल्लेख गर्नुभयो । रुवी भ्याली क्षेत्रमा ग्रामीण पर्यटन, जलविद्युत् र खानीजन्य स्रोतको सम्भावना रहेको उहाँले बताउनुभयो । त्यस्तै गङ्गाजमुना क्षेत्रमा कफी खेती, नेत्रावती क्षेत्रमा तरकारी उत्पादन तथा सल्यानटार क्षेत्रमा कृषि उत्पादन विस्तारको राम्रो सम्भावना रहेको उहाँको भनाइ छ।

“धादिङका विभिन्न पालिकामा फरक–फरक सम्भावना छन्। ती सम्भावनालाई जोडेर योजनाबद्ध विकास अघि बढाउनुपर्छ,” उहाँले भन्नुभयो । सडक पूर्वाधार, इन्टरनेट सुविधा, संस्कृति र पर्यटनलाई जोडेर ग्रामीण तथा खेल पर्यटन प्रवद्र्धन गर्न सकिने उहाँले बताउनुभयो ।

श्रेष्ठले धादिङ जिल्लाको दीर्घकालीन विकासका लागि २० वर्षे रणनीतिक योजना तयार गरी सोही आधारमा विकासका कार्यक्रम अघि बढाउने योजना रहेको जानकारी दिनुभयो ।

राजनीतिमा प्रवेश गर्नुअघि श्रेष्ठले विभिन्न राष्ट्रिय तथा अन्तर्राष्ट्रिय संस्थामा काम गर्नुभएको छ । उहाँले युनिसेफ नेपालमा १७ वर्षसम्म खानेपानी, सरसफाइ तथा स्वच्छता (ध्ब्क्ज्) अधिकृतका रूपमा काम गर्नुभएको थियो । मधेश, वागमती, लुम्बिनी, गण्डकी, कोशी र कर्णाली प्रदेशमा उहाँले प्रत्यक्ष कार्य अनुभव हासिल गर्नुभएको छ ।

त्यस्तै नेपाल रेडक्रस सोसाइटीमा पूर्वमन्त्री, उपसभापति तथा संगठन व्यवस्थापकका रूपमा जिम्मेवारी सम्हालेका श्रेष्ठ बुढीगण्डकी जलविद्युत् आयोजनाका सामाजिक पक्षसम्बन्धी पूर्व सल्लाहकार पनि हुन्। उहाँ बुढीगण्डकी क्याम्पस, ज्वालामुखी धादिङका संस्थापक अध्यक्षसमेत हुनुहुन्छ।

विपद् व्यवस्थापन र जलवायु परिवर्तनका क्षेत्रमा समेत उहाँले उल्लेखनीय अनुभव हासिल गर्नुभएको छ । विभिन्न प्राकृतिक विपद् तथा महामारीका समयमा उहाँले अग्रपङ्क्तिमा रहेर काम गरेको अनुभव छ।

श्रेष्ठ ग्रामीण विकासमा स्नातकोत्तर तथा राजनीति शास्त्रमा स्नातक हुन्। उहाँ नेपालको खुला दिसामुक्त अभियानका प्रमुख अभियन्तामध्ये एकका रूपमा पनि चिनिनुहुन्छ ।

राष्ट्रिय स्वतन्त्र पार्टीमा सन् २०२५ अक्टोबर २ देखि आबद्ध हुनुभएको हो । राजनीतिमा औपचारिक रूपमा प्रवेश गर्नुअघि कुनै दलको सक्रिय सदस्य नभए पनि वैचारिक रूपमा वामपन्थी धारप्रति झुकाव रहेको उहाँ बताउनुहुन्छ ।

निर्वाचनअघि सार्वजनिक गरिएको घोषणा पत्रमा उहाँले सुशासन र संस्थागत सुधार, उत्पादनमुखी अर्थतन्त्र, स्वास्थ्य र सामाजिक सुरक्षा, शिक्षा तथा मानव पूँजी विकास, पूर्वाधार र कनेक्टिभिटी, वातावरण संरक्षण, अध्ययन–अनुसन्धान र नवप्रवर्तन, प्रवास तथा ब्रेन–गेन र सामाजिक न्यायसहित समावेशी विकासलाई प्राथमिकतामा राख्नुभएको छ ।

नवनिर्वाचित सांसद श्रेष्ठले धादिङको विकासलाई योजनाबद्ध रूपमा अघि बढाउँदै नागरिकको प्रत्यक्ष सहभागितामा सुशासन र समृद्धिको मार्गमा जिल्लालाई अघि बढाउने प्रतिबद्धता व्यक्त गर्नुभएको छ ।

उहाँले २६ हजार १४३ मत प्राप्त गर्दै निकटतम प्रतिस्पर्धी कांग्रेसका रमेश धमलालाई ५ हजार ८६५ मतान्तरले पराजित गर्नुभएको हो।
धमलाले २० हजार २७८ मत पाउनुभयो । नेकपा एमालेका धनबहादुर घलेले १० हजार ८४ र नेपाल कम्युनिस्ट पार्टीका रामबहादुर भण्डारीले ९ हजार ३७ मत प्राप्त गर्नुभयो ।

एमाले र कांग्रेसको परम्परागत प्रभाव मानिने धादिङ–२ मा रास्वपाबाट श्रेष्ठको जितलाई स्थानीय राजनीतिक वृत्तमा अर्थपूर्ण परिवर्तनका रूपमा हेरिएको छ ।