झ्याप्ले खोला पहिरो अपडेट : अहिलेसम्म ३५ शव निकालिए

धादिङ, १३ असोज ।
धादिङ र काठमाडौंको सिमानामा पर्ने धुनिबेंसी नगरपालिका-९, झ्याप्ले खोलामा गएको पहिरोमा परेका सवारी साधनहरूबाट अहिलेसम्म ३५ जनाको शव निकालिएको छ। आज बिहानैदेखि सुरु गरिएको सुरक्षाकर्मीहरूको उद्धार प्रयासमा थप २१ जनाको शव फेला परेको हो। जिल्ला प्रहरी कार्यालयका प्रहरी निरीक्षक तथा सूचना अधिकारी प्रह्लाद सिलवालका अनुसार एक माइक्रोबसबाट १६ र यात्रु बसबाट ५ शव निकालिएको छ।

हिजो राति सोही पहिरोमा परेका १४ जनाको शव निकालिएको थियो। पहिरोले पुरिएका सवारी साधनहरू पूर्ण रूपमा ध्वस्त भएका कारण शवहरू छुट्टाछुट्टै अवस्थामा फेला परेका छन्, जसले गर्दा कुन शव कुन सवारी साधनबाट हो भन्ने यकिन गर्न कठिन भएको प्रहरीको भनाइ छ।

सवारी साधनहरू टुक्राटुक्रा भएकोले नम्बर पहिचान गर्नसमेत कठिनाइ भइरहेको सूचना अधिकारी सिलवालले जानकारी दिनुभयो। गोरखाबाट काठमाडौं आउँदै गरेको ना ४ ख २२७० नम्बरको बस भने पहिचान गरिएको छ। एस्काभेटरले पहिरो पन्छाउने क्रममा बसको छतको डण्डीमा चालक मदन परियारको शव फेला परेपछि उक्त बसको पहिचान भएको यातायात व्यवसायी अर्जुन भट्टले बताउनुभयो।

पहिरोमा पुरिएको बसमा प्रारम्भिक रूपमा चालक दलका तीन सदस्य र एक यात्रु रहेको भए पनि बीच बाटोमा थप यात्रु चढाएको हुनसक्ने अनुमान गरिएको छ।

त्यस्तै, चितवनको पुल्चोकबाट यात्रु बोकेर काठमाडौंतर्फ जाँदै गरेको माइक्रोबस ९जम्बो हाइस० पनि झ्याप्ले खोलाको पहिरोमा पुरिएको छ। तर, माइक्रोबसमा कति यात्रु थिए भन्ने कुरा अझै यकिन भएको छैन।

यसैगरी, शुक्रबार अपराह्न करिब २ बजे मनकामना माई यातायात प्रालिद्वारा सञ्चालित बा २ ख १३४५ नम्बरको बस सम्पर्कविहीन रहेको जानकारी प्रालिका अध्यक्ष नरबहादुर रानाले दिनुभएको छ।

सुरक्षाकर्मीहरूले अझै पनि झ्याप्ले खोलामा गएको पहिरो पन्छाउने र उद्धार कार्य निरन्तर रूपमा जारी राखेका छन्।