धादिङका सन्तोष सिंखडाको पोखराको हर्पन खोलामा डुबेर मृत्यु

धादिङ, ०२ साउन ।
धादिङका एक युवकको पोखरास्थित हर्पन खोलामा डुबेर मृत्यु भएको छ । मृत्यु हुनेमा धादिङ त्रिपुरासुन्दरी गाउँपालिका वडा नं. ७ लपाङ घर भई हाल पोखरा महानगरपालिका वडा नं. ८ नागढुंगा बस्दै आएका २५ वर्षीय सन्तोष सिंखडा रहेका छन् ।

सिंखडा साउन १ गते दिउँसो करिब २ बजे पोखरा २३ घाँटीछिना स्थित हर्पन खोलामा पौडी खेल्ने क्रममा डुबेर बेपत्ता भएका थिए । घटनाको जानकारी पाउने बित्तिकै वडा प्रहरी कार्यालय बैदाम र सशस्त्र प्रहरी बल नं.२४ हेडक्वाटर कालिकाबाट उद्दार टोली खटिएर खोजी गरिएकोमा मंगलबार दिउँसो ३ः२० बजे उनको शव भेटिएको जिल्ला प्रहरी कार्यालय कास्कीले जनाएको छ ।

सिंखडाको शव पोखरा स्वास्थ्य विज्ञान प्रतिष्ठानको पश्चिमाञ्चल क्षेत्रीय अस्पतालमा राखिएको र घटनाका सम्बन्धमा आवश्यक अनुसन्धान भइरहेको प्रहरीले जनाएको छ । यसअघि काठमाडौँ बस्दै आएका सन्तोष एक सातादेखि पोखरा स्थित ससुराली घरमा बस्दै आएका थिए ।