ज्वालामुखी गाउँपालिकामा निशुल्क शिक्षा लागु भएको घोषणा

धादिङ, १० असार ।
धादिङको ज्वालामुखी गाउँपालिकाले अनिवार्य तथा निशुल्क शिक्षा लागु भएको घोषणा गरेको छ । गाउँपालिका अन्तर्गतका विद्यालयहरुको आधारभुत तहमा अनिवार्य तथा निशुल्क शिक्षा लागु भएको आईतबार एक कार्यक्रमको आयोजना गरि घोषणा गरिएकोे हो । बागमति प्रदेश सरकारको सहयोगमा गाउपालिकालाई अनिवार्य तथा निःशुल्क शिक्षा घोषणा गरिएको हो ।

वागमति प्रदेश सरकारको बागमती प्रदेश प्रदेश शिक्षा विकास निर्देशनालयका महानिर्देशक दिपेन्द्र सुवेदीले ज्वालामुखी गाउँपालिकालाई अनिवार्य तथा निःशुल्क शिक्षा लागु भएको गाउपालिका घोषणा गर्नुभएको थियो ।

यसैगरि कार्यक्रमलाई सम्बोधन गर्नुहुदै प्रदेश सरकारले शिक्षा क्षेत्रलाई पहिलो प्राथमिकता दिएर काम गर्दै आएको बताउनु भयो । त्यस्तै निःशुल्क शिक्षा घोषणाले सामुदायिक विद्यालयहरुलाई चुनौती थप्ने हुनाले सबैले सहयोग गरेर अभियानलाई निरन्तरता दिन आवश्यक रहेको बताउनु भयो । बजेट छुटाउने क्रममा बागमती सरकारले धादिङलाई धेरै कार्यक्रम दिएको पनि सुवेदीको भनाई छ ।

उक्त कार्यक्रमलाई सम्बोधन गर्नुहुदै गाउपालिकाका अध्यक्ष यामनाथ दनैले विद्यालय जाने उमेरका सबै बालबालिका विद्यालय बाहिर नरहेकोले आफ्नो पालिकालाई अनिवार्य तथा निःशुल्क शिक्षा लागू भएको स्थानीय तह घोषणा गरिएको बताउनु भयो । यसै गरि उहाँले अनिवार्य तथा निःशुल्क शिक्षा लागू गर्नेको लागि साथ र सहयोग गर्ने सबै जनालाई धन्यवाद व्यक्त गर्नुभएको थियो ।

गाउपालिकाको ७ वटै वडामा अनिवार्य तथा निःशुल्क शिक्षा लागू भएको र वडा घोषणा भइसकेकोले ‘अनिवार्य तथा निःशुल्क शिक्षा लागू भएको स्थानीय तह’ घोषणा गरिएको गाउपालिकाले जनाएको छ ।