प्लाष्टिकजन्य फूलगुच्छा तथा मालाको प्रयोग नर्गन प्रशासन कार्यालय धादिङको अनुरोध

धादिङ,२२ कात्तिक ।
जिल्ला प्रशाासन कार्यालय धादिङले प्लाष्टिकजन्य फूलगुच्छा तथा मालाको प्रयोग नगर्न अनुरोध गरेको छ । मंगलबार प्रशासन कार्यालयले एक सुचना जारी गर्दै प्लाष्टिकजन्य सामाग्रीको प्रयोग नगर्न अनुरोध गरेको हो ।

नेपालीहरूको मुख्य पर्वहरु शुभ दिपावल, नेपाल सम्वत् तथा छठ पर्व लगायत मेला महोत्सव तथा अन्य सभा समारोहहरूमा प्लास्टिकका फूलगुच्छा तथा मालाहरुको प्रयोग नगर्न प्रशासनले सुचना मार्फत सचेत गराएको छ ।

प्लाष्टिकजन्य सामग्रीहरूको प्रयोगले वातावरण प्रदुषण हुने, स्थानीय कृषकहरुबाट उत्पादित फूलले बजार नपाउने तथा ठूलो धनराशी बाहिरिने जस्ता समस्याहरु देखिने भएकाले प्लाष्टिकजन्य फूलगुच्छा, माला लगायतका सामग्रीहरुको प्रयोग तथा विक्रिवितरण नगर्न प्रशासनले अनुरोध गरेको हो ।

प्लाष्टिकजन्य सामाग्रीको प्रयोग र विक्रि वितरणलाई नियन्त्रण गरी स्थानीयस्तरमा उत्पादित फूल तथा कृषि उपजहरुको प्रयोग गर्न/गराउन सार्वजनिक निकाय, राजनैतिक दल, उद्योग व्यवसायी, नागरिक समाज लगायत सम्पूर्ण जिल्लावासीहरुमा अनुरोध छ सूचनामा भनिएको छ ।

साथै सुचनाको अवज्ञा गरी प्लाष्टिकजन्य फूलगुच्छा, माला आदिको उत्पादन, विक्रि वितरण वा भण्डारण गरेको पाइएमा प्रचलित कानून बमोजिम कारवाही गरिने समेत जनाएको छ ।